Pas fshehjes për disa muaj, Agjencia e Zhvillimit të Territorit ka bërë publike më në fund vendimet e miratuara në 6 mbledhjet e fundit të Këshillit Komëtar të Territorit. Dhe panorama e vendimeve është një invazion betoni në shkallë të plotë nga Tirana deri në qytetet bregdetare dhe ato liqenore.
Sipas dokumentave të publikuara, në mbledhjen e fundit të zhvilluar tre ditë më parë, KKTU ka miratuar lejen e zhvillimit për ndërtimin e një kulle 47 katëshe në rrugën e Elbasanit me emrin Embassy Tower. Kompania ndërtuese e kullës është Hanxhari Group, që zotërohet nga Adjon Hanxhari. Ky është djali i ndërtuesit vlonjat Fatmir Hanxhari, që zotëron hotelin Vlora Internacional.
Në dokumentet e KKT nuk saktësohet se vendi i saktë i përbindëshit 47 kate në rrugën e Elbasanit, por Kapitali ka mësuar se kulla do të jetë në afërsi të Ambasadës Amerikane.
Ndërkohë një mbledhje më parë, KKT ka miratuar lejen e zhvillimit për objektin “Ksamil Seaside Resort & Residential, The Mirrors, Faza I”. Bëhet fjalë për një kompleks në plazhin e njohur si Pasqyrat në Ksamil, një nga perlat e bregdetit shqiptar. Por barbaria e betonit dhe eurot që vërshojnë lumë nuk i kursyen as pasqyrat e Ksamilit.
Leja e Zhvillimit për resortin tek Pasqyrat i është dhënë kompanisë Premium Finance Invest. Pronari i saj është Bledar Sinani, një nga ish aksionerët e Apexit, që tani zotëron pjesën dërrmuese të kazinove në Tiranës.
Në po të njëjtën mbledhje KKTU ka miratuar dhe një tjetër projekt kontrovers. Bëhet fjalë për një varg kullash të larta në qytetetin e Pogradecit. Sipas vendimit, KKT ka miratuar lejen e ndërtimit për objektin “Pogradec Marina” (Koran Village), objekte me funksione komplekse, shërbimi, hoteleri dhe rezidenciale me 3, 4, 5, 9, 11, 12, 18, 22 dhe 23 kate mbi tokë me 1-2 kat nëntokë, plus galeri arti me funksion publik”, me vendndodhje ne Rrugen “Reshit Collaku”, Bashkia Pogradec.”
Kjo leje ndërtimi e shtrin epideminë e betonit masiv që ngrihet deri në qiell edhe në qytetin e Pogradecit. Kompleksi i kullave të lartë shtrihet fiks në bregun e Liqenit në zonën me të bukur të Pogradecit, gjatë rrugës Reshit çollaku. Ndërtuesi i këtij vargmali betoni është Armand Lilo, i njohur ndryshe si biznesmeni që ndërtoi 8 kate pa leje në kullën Eyes of Tirana në Sheshin Skendërbej, përpara hundës së Erion Veliajt.
Por edhe pse theu lejen në zemrën e Tiranës, Lilo vazhdon të marrë leje nga qeveria në zonat më të lakmuara. Projekti për betonizimin masiv të Pogradecit është denoncuar publikisht edhe nga Opozita. Sali Berisha e ka cilësuar Mand Lilon si Bajlozi i Zi, i cili me këtë projekt zhduk totalisht identitetin e qytetit të Pogradecit.
Këto ishin vetëm lejet më kontraverse të miratuara gjatë muajve të fundit në KKTU, por ka dhe shumë të tjera. Në Jalë, Alban Xhillari po shtrin me shpejtësi qindra vila, praktikisht në të gjithë bregdetin, ndërsa në Himarë dhe Dhërmi janë miratuar lejet për disa komplekse dhe resorte.
Discussion about this post