Këshilli i Lartë Gjyqësor (KLGJ) ka rrëzuar kërkesën e Pamela Qirkos, ish-anëtare dhe ish-kryetare e Komisionit të Pavarur të Kualifikimit (KPK), për t’u emëruar gjyqtare në Gjykatën e Apelit të Juridiksionit të Përgjithshëm.
Pamela Qirko, e cila është motra e ish-zëvendëskryeministres Belinda Balluku, ishte një nga 10 ish-anëtarët e institucioneve të vetingut që aplikuan për t’u bërë pjesë e sistemit gjyqësor pas përfundimit të mandatit të tyre kushtetues.
Në mbledhjen plenare të zhvilluar më 10 korrik 2026, KLGJ vendosi të rrëzojë kërkesat e të gjithë aplikantëve nga KPK për emërim në Gjykatën e Apelit.
Përveç Pamela Qirkos, u refuzuan edhe kërkesat e Suela Zhegut, Firdes Shulit, Alma Faskajt, Brunilda Bekteshit, Olsi Komicit, Valbona Sanxhaktarit, Xhensila Pines, Etleda Çiftjas dhe Roland Ilisë.
Përveç këtij vendimi, KLGJ miratoi raportin e vlerësimit etik dhe profesional të gjyqtares Brunilda Kadi për vitin 2024, ndërsa shtyu shqyrtimin e vlerësimit për gjyqtarin Adrian Shega.
Këshilli vendosi gjithashtu caktimin me short të relatorit për procedimin disiplinor ndaj gjyqtares Suela Dashi, zgjati afatin e delegimit të gjyqtarit Sokol Ibi dhe miratoi ricaktimin e tij në Gjykatën Administrative të Apelit.
Në të njëjtën mbledhje u vendos edhe zëvendësimi i nëpunëses përgjegjëse për vlerësimin në disa procedura, u shpall e përfunduar pa vendim përfundimtar procedura e verifikimit për një kandidate të Shkollës së Magjistraturës, si dhe u shty shqyrtimi i një projektvendimi që lidhet me rishpërndarjen e fondeve buxhetore për gjykatat.
Discussion about this post