Deputeti demokrat Belind Këlliçi ka ngritur dyshime se vendimi i fundit i Gjykatës Kushtetuese, që riktheu në detyrë Erion Veliajn mund të jetë ndikuar politikisht nga kryeministri Edi Rama, për shkak të situatës që lidhet me zëvendëskryeministren Belinda Balluku, e marrë e pandehur nga SPAK.
Për News24, Këlliçi tha se Balluku është një nga bashkëpunëtoret më të afërta të Ramës që prej kohës kur ai ishte kryetar bashkie, duke theksuar se “goditja ndaj saj është goditje direkte për Edi Ramën”.
Sipas tij, Balluku ka luajtur një rol kyç në aferën e njohur si “Tuneli i Palloshit”, që lidhet me projektin e tunelit të Llogarasë, ndërsa akuzoi se procedurat për këtë projekt janë ndarë “sipas ndjesive” të saj.
“Unë kam dyshimet e mia se edhe vendimi i Gjykatës Kushtetuese ka qenë i dirigjuar nga Rama për shkak të situatës që i ndodhi me Ballukun, drejtuesen politike për Tiranën. Ogerta Manastirliu ishte fytyra, ndërsa makineria korruptive, elektorale, e parave, e krimit të organizuar dhe shantazhit ishte Belinda Balluku dhe me goditjen që i ndodhi Ballukut pozitat dhe situata nuk ishin të njëjta”, u shpreh deputeti i PD.
Këlliçi tha se Rama eshte detyruar qe ta rikonfirmoje në detyrën e zv, kryeministres dhe ministres se Infrastruktures.
“Balluku është personi më i afërt i Edi Ramës që në kohën kur ishte kryetar bashkie dhe njeriu që ai ka patur udhëtimin e tij politik. Goditja për Ballukun është e drejtpërdrejtë për Edi Ramën. Nga ana tjetër shpalosja e aferës së “Tunelit të Palloshit”, sic Balluku e quan Ramën…Balluku kërcënon Edi Ramën, Rama nuk ka dashur ta rikonfirmojë në detyrë, por aferat e përbashkëta e kanë detyruar Ramën që të zbatojë kërkesën e Ballukut për ta rikonfirmuar në detyrë. Është Balluku që ka qenë personi që ka zbatuar procedurën korruptive të Tunelit të Llogarasë, ajo ndan procedurën sipas ndjesive”, tha Këlliçi.
Discussion about this post