Vendimi i GJKKO për Berishën, Gjokutaj: U shkelën afatet, ja ç’thotë neni 249

GJKKO ka zbardhur sot vendimin lidhur me masat e sigurisë ndaj Jamarbër Malltezit dhe ish-Kryeministrit Sali Berisha.

Malltezi ndodhet në qeli prej më shumë se dy javësh me akuzat për korrupsion dhe pastrim parash, ndërsa Berisha po hetohet për akuzën e korrupsionit, duke iu caktuar dy masa sigurie: detyrim paraqitje dhe ndalim të udhëtimeve jashtë vendit.

GJKKO në vendimin e saj shprehet se për këto masa kufizuese nuk është e nevojshme që të kërkohet autorizim nga Kuvendi në rastin e Berishës, që ka edhe mandatin e deputetit.

Avokati Genc Gjokutaj, i cili mbron Berishën në çështjen e privatizimit të ish-kompleksit Partizani, akuzon GJKKO se ka shkelur të gjitha afatet, pasi vendimi u zbardh me 12 ditë vonesë.

Gjokutaj shpjegon se nuk kanë patur kohë të apelojnë vendimin pasi nuk është zbardhur brenda afateve ligjore siç e kërkon procedura.

Sipas Gjokutajt, në nenin 249 thuhet se vendimi i pa ekzekutuar ose pa shpallur bën që akti ose masat e sigurimit e marra e humbasin fuqinë e tij.

“Duhet të kuptojmë që në datën 20 ndaj Berishës dhe Malltezit janë marrë masat e sigurimit. Në funksion të këtyre masave brenda tre ditëve është dhënë vendimi për Malltezin dhe në datën 26 është dhënë për Berishën. Brenda 48 orëve gjykata e ka detyrim ligjor të depozitojë vendimin e arsyetuar. Dhe jemi gati 12 ditë në vonesë për Berishën dhe 15 ditë në vonesë për Malltezin.

Ky është një rast unik për masat e sigurimit pasi janë afate strikte dhe që lidhen me lirinë personale të personit ndërsa në këtë rast gjykata nuk ka arsyetuar asgjë dhe vetëm sot pas denoncimit tonë ka bërë zbardhjen e vendimit dhe ajo e panikosur sot në drekë e ka depozituar vendimin.

Ne nuk kemi mundur dot të apelojmë pa pasur vendimin zbardhur në dorë dhe gjykata ka shkelur të gjitha afatet ligjore dhe kjo vonesë në kushte normale nuk do të na lejonte të apelonim vendimin po duke e ditur se është një proces i montuar politikisht kemi marrë masat tona duke zënë afatet për ta duruar çështjen në apelim.

Në nenin 249 thuhet se vendimi i pa ekzekutuar ose pa shpallur bën që akti ose masat e sigurimit e marra e humbasin fuqinë e tij dhe ne do të shkojmë nesër në gjykatë të kërkojmë heqjen e masës së sigurisë arrest me burg për Malltezin dhe masën ndaj Berishës”, ka thënë Gjokutaj.