Avokati i familjarëve që u prekën nga tragjedia e Gërdecit, Dorian Matilija, ka vlerësuar vendimin e GJKKO për të hapur gjykimi ndaj ish-ministrit të Mbrojtjes, Fatmir Mediu. Në një prononcim për mediat, ai tha se kjo është faza e parë dhe do të ketë shumë komplikacione deri në rezultatin e kërkuar prej familjarëve.
Këtu ai sqaroi se ky nuk është rigjykim, sepse në të vërtet Maediu nuk është gjykuar asnjëherë. Sipas tij, sot pas kaq vitesh u hoqën pengesat për të kërkuar të drejtën.
“Nuk është hapur rigjykimi, por gjykimi, është hequr pengesa për tu hapur gjykimi. Më në fund kjo pengesë është hequr dhe jemi në kushtet që seanca do të nisë. Çështja është e komplikuar. Jemi ende në fillim, është lajm i mirë që është hequr një pengesë absurde juridike. Të gjitha argumentet e dhënë nga shkalla e parë kanë qenë të gabuara. Gjykata e shkallës së parë kishte mendimin që ajo çështje quhet e mbyllur.
Por një çështje është ose quhet e mbyllur kur jepet një dënim ose mos dënim”, tha Matilija.
Ndërkohë edhe familjarët e prekur nga kjo tragjedi e quajtën hap pozitiv vendimin e gjykatës.
