Presidenti i Serbisë, Alexandar Vuçiç ka thirrur një mbledhje urgjente të Këshillit të Sigurisë Kombëtare të Serbisë, pas vendimit të qeverisë së Kosovës për zbatimin e reciprocitetit të targave.
Mësohet se mbledhja është caktuar të mbahet nesër në orën 10:00, në fokus të së cilës do të jenë ngjarjet në Kosovë.
Mëngjesin e sotëm, Njësitë e Specializuara të Policisë së Kosovës janë pozicionuar në pikën kufitare Kosovë-Serbi, në Jarinjë. Dhjetëra autoblinda të Policisë së Kosovës janë pozicionuar atje për të siguruar zbatimin e vendimit më të fundit të Qeverisë së Kosovës. Asnjë makinë që niset nga Serbia drejt Kosovës, nuk mund të kalojë në pikat kufitare, pa u pajisur me targat e përkohshme të Republikës së Kosovës që kushtojnë pesë euro.
Ndërkaq, kanë nisur të hyjnë veturat e para nga Serbia në Kosovës, të cilave nëpër pikat kufitare po iu vendosen tabelat e përkohshme. Në pikën kufitare në Jarinjë, disa qytetarë serbë kanë bllokuar rrugën dhe po protestojnë.
