Komisioni Qendror i Zgjedhjeve ka miratuar afatet procedurale për zhvillimin e zgjedhjeve të pjesshme për kryetar bashkie në gjashtë bashki: Tiranë, Berat, Tepelenë, Cërrik, Mat dhe Vlorë, të cilat do të mbahen më 9 nëntor 2025.
Sipas vendimit të miratuar, fushata zgjedhore do të nisë më 1 nëntor, ndërsa afati për regjistrimin e partive politike si subjekte zgjedhore përfundon më 11 tetor. Po ashtu, janë përcaktuar afatet për dorëzimin e kandidaturave, emërimin e komisioneve zgjedhore dhe akreditimin e vëzhguesve.
Institucionet publike qendrore e vendore, si dhe ndërmarrjet shtetërore, janë të detyruara të raportojnë në KQZ çdo veprimtari publike që planifikojnë të zhvillojnë nga 11 tetori deri më 9 nëntor në këto bashki. AMA do të monitorojë transmetimet mediatike për veprimtaritë publike të këtyre institucioneve.
Në vendim nënvizohet ndalimi i publikimit të sondazheve zgjedhore gjatë tri ditëve të fundit para zgjedhjeve, përfshirë ditën e votimit, deri në mbylljen e qendrave të votimit.
“Fushata zgjedhore për zgjedhjet e pjesshme vendore për Kryetar bashkie në Bashkitë Tiranë, Berat, Tepelenë, Cërrik, Mat dhe Vlorë, fillon më datë 1.11.2025.
Partitë politike duhet të paraqesin kërkesën në KQZ, për regjistrim si subjekte zgjedhore, për zgjedhjet e pjesshme për Kryetar në Bashkitë Tiranë, Berat, Tepelenë, Cërrik, Mat dhe Vlorë, jo më vonë se data 11.10.2025. KQZ-ja kthen për plotësim dokumentacionin brenda 24 (njëzet e katër) orëve nga dorëzimi. Partitë politike paraqesin dokumentacionin e korrigjuar brenda 24 (njëzet e katër) orëve nga kthimi për plotësim. Komisioneri Shtetëror i Zgjedhjeve miraton kërkesat për regjistrim brenda 24 (njëzet e katër) orëve nga ridërgimi i dokumentacionit
Koalicionet zgjedhore duhet të paraqesin në KQZ ose sipas rastit në KZAZ, kërkesën për regjistrimin si koalicion për zgjedhjet e pjesshme për Kryetar në Bashkitë Tiranë, Berat, Tepelenë, Cërrik, Mat dhe Vlorë, jo më vonë se data 16.10.2025. Komisioneri Shtetëror i Zgjedhjeve ose sipas rastit KZAZ-ja miraton kërkesën për regjistrimin si koalicion, brenda 24 (njëzet e katër) orëve”, thuhet në vendim.
Nga ana e Partisë Socialiste, kandidatja për Tiranën, Ogerta Manastirliu, ka nisur takimet me qytetarët.
Ndërsa opozita vijon negociatat për të përzgjedhur kandidatin, me emrat më të përmendur deri më tani Edlira Çepani dhe Ermal Hasimja.
Discussion about this post