Instituti i Studimeve Politike bie në konsensus me vendimin e Gjykatës Kushtetuese për rrëzimin e padisë së Shoqatës së Bashkive lidhur me vlefshmërinë e zgjedhjeve të 30 qershorit.
Sipas Institutit, vendimi i Gjykatës duhet të respektohet nga çdo palë, dhe mbyllja e procesit duhet t’iu shërbejë partive politike lidhur me vendimet e tyre të së kaluarës dhe sjelljen politike të së ardhmes.
Ndërsa partitë mund të përdorin mjetet politike dhe dialogun politik për reflektimin e tyre ndaj vendimit të GJK, për ISP, institucioni i KQZ dhe i presidentit të Republikës duhet të përmbushin përgjegjësitë ligjore lidhur me vendosjen e legjitimitetit kushtetues në të gjitha bashkitë, në të cilat kryetarët në detyrë vijojnë ushtrimin e përkohshëm të drejtimit.
IPS shprehet se ky është momenti që politika të reflektojë me akte konkrete dhe vullnet politik, ndërsa shpreh shqetësimin se në Vorë, Durrës, Dibër, Shkodër, bashki me drejtim të përkohshëm, janë riaktivizuar në stafet politike drejtuese individë të penalizuar nga procesi i dekriminalizimit apo të tjerë me rekorde penale në proces.
Duke theksuar mesazhin e ndërkombëtarëve, ISP shprehet se është koha për politikë dhe politikanë të pastër, dhe koha që partitë të mbajnë premtimet dhe të dëshmojnë vullnet politik real për t’u ndarë nga individë, dhe financime që cenojnë integritetin e proceseve zgjedhore dhe vendimmarrëse në Shqipëri.
Discussion about this post