Qeveria e Kosovës ka marrë vendimin për të ndihmuar familjet që humbën familjarë për shkak të COVID-19. Ministri i Financave, Punës dhe Transporteve, Hekuran Murati ka nënshkruar vendimin për mbështetjen me të ardhura ndaj familjarëve që kanë humbur të afërmit nga pandemia e koronavirusit.
Sipas njoftimit të MFPT-së, secilës familje që ka humbur familjarin si pasojë e infektimit me COVID-19 do t’i ofrohet mbështetje financiare në vlerë prej 1,500 Euro.
“Sidoqoftë, duke konsideruar që stafi mjekësor në sektorin publik ka bartur barrën kryesore në ruajtjen e shëndetit publik, dhe gjatë ushtrimit të detyrës zyrtare kanë qenë drejtpërdrejtë të rrezikuar nga virusi COVID-19, familjet e tyre do të kenë një mbështetje të veçantë,”- thuhet në njoftim.
Aplikimi do të bëhet në mënyrë elektronike dhe do të jetë i hapur deri më datë 30 Nëntor 2021.
