Pamela Qirako, motra e Belinda Ballukut, do të trajtohet si VIP në aeroportin “Nënë Tereza”. Me një vendim të publikuar së fundmi, Balluku ka shtuar edhe postin e së motrës, Pamela Qirko, kryetare e Komisionit të Pavarur të Kualifikimit, për të përdorur një nga tre sallat VIP të aeroportit “Nënë Tereza”.
Vendimi
Vendimi është marrë më datë 19 dhjetor të vitit 2022, por është botuar vetëm dje, në Fletoren Zyrtare. Çka tregon se Balluku është munduar ta mbajë të fshehtë këtë favor për motrën e saj. Por, tani i doli hapur dhurata që i paska bërë motrës për festat e fundvitit.
“Në kapitullin V, pika 2, “Përdorimi i sallës VIP të aeroportit”, në fund të nënpikës 3 shtohen këto autoritete: Anëtarët e Gjykatës Kushtetuese; Kryetari i Kolegjit të Posaçëm të Apelimit; Inspektori i Lartë i Drejtësisë; Krye tari i Këshillit të Lartë Gjyqësor; Drejtuesi i Prokurorisë së Posaçme; Kryetari i Këshillit të Lartë të Prokurorisë; Kryetari i Këshillit të Emërimeve në Drejtësi; Kryetari i Gjykatës së Posaçme; Kryetari i Komisionit të Pavarur të Kualifikimit; Komisionerët publikë; Drejtori i Shkollës së Magjistraturës; Drejtuesi i Byrosë Kombëtare të Hetimit”, thuhet në vendim.
Kujtojmë këtu se, kryetarja e KPK është Pamela Qirako motra e zëvendësministres Belinda Balluku. Në fakt është e qartë që ky vendim ka ardhur më shumë si dhuratë për Pamelën. Në listë ka shumë pozicione që duhet të trajtohen nga Protokolli për shkak të natyrës së funksionit, siç janë Drejtori i Byrosë Kombëtare të Hetimit, drejtori i Magjistraturës apo Inspektori i Lartë i Drejtësisë, por komisioni i Vetingut (KPK) është shtuar rishtazi për motrën e Belindës. Mbase i duhet të trajtohet si VIP, kur i bënë shoqëri të motrës për turizëm në metropolet evropiane.
Nuk është hera e parë që Belinda Ballukut i dalin skandale, ku duke shfrytëzuar postin e saj, favorizon miq dhe familjarë të saj. Kjo për shkak se ajo është e paprekshme nga drejtësia, saqë tani po iu përkëdhel sedrën këtyre të fundit duke i bëra VIP-a.
Si funksionon salla VIP?
Salla VIP e Aeroportit “Nënë Tereza” është e formuar nga tre mjedise, shfrytëzimi i të cilave është i diferencuar dhe bëhet në bazë të rregullave të Protokollit të Shtetit, të vendosura me ligj. Salla 1 rezervohet për: Kryetarë shteti (president republike, mbret, princ trashëgimtar); Kryetarë qeverie – Kryetarë parlamenti, Sekretari i Përgjithshëm i OKB-së, Presidenti i Komisionit Europian dhe Sekretari i Përgjithshëm i NATO-s, Presidenti i Parlamentit Europian.
Salla 2 rezervohet për: Kryetar i Gjykatës Kushtetuese; Nënkryetar Kuvendi; Zëvendëskryetar qeverie; Anëtarë qeverie, deputetë; Ish-president i Republikës; Komisionerë të Parlamentit Europian, Sekretari i Përgjithshëm i OSBE-së;- Ambasadorë të huaj të akredituar në Shqipëri dhe ambasadorët shqiptarë në krye të detyrës. Të ngarkuar me punë a.i; Ish-kryeministër, anëtar i Gjykatës Kushtetuese, kryetar i Komisioni Parlamentar, Kryetari i Bashkisë së Tiranës; Avokati i Popullit, kryetari i Gjykatës së Lartë, Prokurori i Përgjithshëm, Guvernatori i Përgjithshëm i Bankës së Shqipërisë, kryetar i KLSH-së dhe të barabartë në rang; Zëvendësministër, Sekretar i Përgjithshëm i Këshillit të Ministrave dhe i Presidencës; Shefi i Shtabit të Përgjithshëm të Ushtrisë, kryetari i SHISH-it; Grada Gjeneral, kur është në përbërje të një delegacionit zyrtar; 2.4
Në autoritetet që përdorin sallën 2 është shtuar edhe motra e Belindës. Ndërkohë, Salla VIP nr. 3 mund të rezervohet nga: – kompani të huaja apo vendase; ambasada të huaja rezidente apo jorezidente në Tiranë; organizata ndërkombëtare dhe përfaqësi të biznesit vendas dhe të huaj; sportistë që kanë fituar medalje në aktivitetet kombëtare apo ndërkombëtare. Përdorimi sallës 3 dhe i parkingut të VIP-ave është kundrejt pagesës.
Lexo edhe: Balliu: Balluku bën rrugët, motra e saj zgjedh prokurorët
©️Copyright Gijotina.com
Ky artikull është ekskluziv i Gijotina.com, gëzon të drejtën e autorësisë sipas Ligjit Nr. 35/2016, “Për të drejtat e autorit dhe të drejtat e lidhura me to”. Shkrimi mund të ripublikohet nga mediat e tjera vetëm duke cituar Gijotina.com dhe në fund të vendoset linku i burimit, në të kundërt çdo shkelës do të mbajë përgjegjësi sipas Nenit 178 të Ligjit Nr/ 35/2016.
Discussion about this post