Ish-Kryeministri Sali Berisha iu rikthye akuzave dhe sulmeve ndaj kreut të SPAK, Altin Dumani, duke e akuzuar këtë të fundit se u përdor nga Edi Rama, për të kërcënuar anëtarët e Gjykatës së Lartë, në dhënien e një vendimi ndaj gazetarit Elton Qyno, vendim të cilin kreu demokrat e konsideroi si një goditje vdekjeprurëse për median.
Berisha tha se me një pengmarrje të pashembullt të institucioneve, Gjykata e Lartë, në kundërshtim flagrant me vendimin e para një viti, vendosi të detyrojë gazetarët të zbulojnë burimin e informacionit, në një akt shkelje flagrante të lirisë së shprehjes.
“Çfarë ndodhi? Edi Rama përdori pengmarrjen.
Edi Rama, siç shkruajnë mediat sot, vërsuli Dumanin kundër tyre.
Dhe Dumani i kërcënoi ata për krimin e tij të shëmtuar, sepse dosjen e Nuredin Dumanit e ka shitur Skapi i partisë nga sirtarët e Altin Dumanit.
Vendimi i gjykatës është një goditje vdekjeprurëse për informacionin e lirë, për mendimin e lirë në Shqipëri. Shënon aktin, përshkallëzimin më dramatik në dhunimin e lirive të shqiptarëve. Ndaj dhe bëhet çdo ditë më imperative përballja me diktaturën. Me narkoregjimin.
Sot kemi përpara Edi Ramën, kreun e krimit të organizuar, kreun e korrupsionit qeveritar, kreun e dhunës mbi opozitën, dhe veglat e tij, një llum njerëzor në gjykata, prokurori, Skap e me radhë.
Urdhëroni, një vit më parë vendosin se gazetarëve nuk mund t’u kërkohet burimi.
Pas një viti, nën hanxharë, vendosin të kundërtën.
Shikoni gjykatën e Edi Ramës, prokurorinë e partisë, këta janë rrezik për çdo qytetar, janë rrezik për mbarë Shqipërinë.
Sot përpara ne kemi murin e tmerrshëm të korrupsionit që përzë shqiptarët çdo ditë.
Edi Rama, me të gjithë fuqinë e ekzekutivit, firmos dhe vjedh qindra milionë e miliarda dhe mbrohet nga Skapi i partisë”, tha Berisha.
Discussion about this post