Nënkryetari i Partisë Demokratike, Alfred Rushaj, tha në fund të mbledhjes së Konferencës së Kryetarëve se është rënë dakord që mbledhjet e Komisioneve Parlamentare të zhvillohen fizikisht në salla.
Në një prononcim për mediet, Rushaj tha se në mbledhjen e sotme është rënë dakord që tre Komisionet Hetimore të propozuara nga PD, të kalojnë në seancën plenare të datës 14 tetor për diskutim dhe miratim.
“Vendimi që u mor sot në Konferencën e Kryetarëve kishte të bënte me kthimin e ligjshmërisë, sa i përket mbledhjes së komisioneve. Pas përpjekjeve tona për të vendosur ligjshmërinë, lidhur me punën që opozita duhet të bëjë në komisionet parlamentare, sot u ra dakord përfundimisht që mbledhjet të bëhen me prezencë fizike, siç e parashikon rregullorja, duke respektuar masat anti-Covid. Po kështu u diskutua dhe ra dakord që të tre Komisionet Hetimore të kalojnë në seancën e datës 14 tetor për diskutim dhe miratim. Ne paraqitëm kërkesën tonë në përputhje me ligjin, dhe i bëmë të qartë deputetëve të PS se e drejta e opozitës për të ngritur Komisione Hetimore është e patjetërsueshme. U ra dakord që të tre Komisionet të kalojnë në seancë plenare. Ne nuk tërhiqemi nga ajo që Kushtetuta ka vendosur në raport me Komisionet Hetimore”, tha Rushaj.
Në mbledhjen e sotme të Konferencës së Kryetarëve, u miratua kërkesa e opozitës për zhvillimin e mbledhjeve të Komisioneve fizikisht, dhe jo online. Në projekt- vendimin e miratuar nënvizohet gjithashtu se për të marrë pjesë në mbledhjet e Komisioneve, deputeti duhet të dorëzojë pranë sekretarisë së komisionit certifikatën e vaksinimit ose testin PCR negativ të kryer jo më vonë se 48 orë përpara fillimit të mbledhjes.
