Qytetarët e Tiranës do të duhet të “luftojnë“ për të siguruar një vend në autobusët e kryeqytetit, kjo pas vendimit të marrë nga ana e Unionit të Transportit Publik, i cili njoftoi se numri i autobusëve do të përshkallëzohet.
Bashkia e Tiranës reagoi në lidhje me këtë vendim, duke njoftuar se është duke e ndjekur nga afër situatën, por pa dhënë një afat se kur do të vijë zgjidhja.
Në këtë situatë, në qytet pritet të shkaktohet një kaos i vërtetë, duke shkaktuar dyndje të mëdha udhëtarësh. Neglizhenca e bashkisë, vihet në dukje për herë të dytë, ku së pari ishte ajo ndaj problemeve me të cilat përballej transporti urban, e së dyti qytetarët të cilët tashmë do të duhet të “luftojnë” për të hyrë në autobusë.
Numri aktual i autobusëve urbanë në Tiranë, nuk ka mundur t’i japë zgjidhje dyndjeve të mëdha të qytetarëve, të cilat pritet të përkeqësohen edhe më tepër këtë periudhë.
Në anën tjetër, pritet që kjo gjë të sjellë dhe në një mosrespektim total të masave anticovid, ku numri i lejuar i personave në një ambient të mbyllur është shumë herë më i lartë nga ai i lejuari.
Unioni i Transportit Publik, njoftoi se do të përgjysmohet numri i autobusëve urbanë, për shkak të problemeve të shkaktuara, neglizhencës së qeverisë dhe çmimit të lartë të naftës.
