Qeveria ka miratuar në mbledhjen e sotme një vendim, sipas të cilit shërbimit sekret i hiqen 60 mln lekë, të cilat i shtohen buxhetit të Ministrisë së Kulturës.
Në vendim thuhet se Shërbimit Informativ të Shtetit, në programin “Veprimtaria informative shtetërore”, në shpenzime korente, i pakësohet fondi prej 60 000 000 lekësh. Kjo shumë i shtohet Ministrisë së Kulturës në programin “Arti dhe Kultura”.
Vendimi vjen në një kohë kur flitet gjithmonë e më shumë për çështjet e sigurisë, ndërkohë që Qeveria ka menduar t’ia pakësojë fondin Shërbimit Sekret, dhe t’ia kalojë Ministrisë së Kulturës për organizimin e aktiviteteve kulturore gjatë sezonit turistik.
V E N D I M
PËR
RISHPËRNDARJE FONDESH NË BUXHETIN E MIRATUAR PËR VITIN 2023, NDËRMJET MINISTRISË SË KULTURËS DHE SHËRBIMIT INFORMATIV TË SHTETIT
Në mbështetje të nenit 100 të Kushtetutës, të nenit 44, ligjit nr.9936, datë 26.6.2008, “Për menaxhimin e sistemit buxhetor në Republikën e Shqipërisë”, të ndryshuar, dhe të nenit 17, të ligjit nr.84/2022, “Për buxhetin e vitit 2023”, me propozimin e ministrit të Financave dhe Ekonomisë dhe të ministrit të Kulturës, Këshilli i Ministrave
V E N D O S I:
- Në buxhetin e miratuar për vitin 2023 bëhet rishpërndarja e fondeve, si më poshtë vijon:
- a) Ministrisë së Kulturës, në programin “Arti dhe kultura”, në shpenzime korente, i shtohet fondi prej 60 000 000 (gjashtëdhjetë milionë) lekësh, për promovimin e trashëgimisë kulturore nëpërmjet zhvillimit të aktiviteteve artistiko-kulturore përgjatë sezonit turistik veror 2023.
- b) Shërbimit Informativ të Shtetit, në programin “Veprimtaria informative shtetërore”, në shpenzime korente, i pakësohet fondi prej 60 000 000 (gjashtëdhjetë milionë) lekësh.
- Ngarkohen Ministria e Financave dhe Ekonomisë, Ministria e Kulturës dhe Shërbimi Informativ i Shtetit për zbatimin e këtij vendimi.
Ky vendim hyn në fuqi menjëherë dhe botohet në “Fletoren zyrtare”.
Discussion about this post