Vendimi/ Qeveria rrit çmimet e referencave për pronat, ja zonat më të shtrenjta -

Çmimi mesatar i shitjes së pronës në Tiranë vlerësohet të jetë 124 mijë lekë/m2. Me miratimin e ri të referencave, çmimet janë rritur në të gjithë vendin, ku zonat më të shtrenjta rezultojnë Farka, Liqeni Artificial dhe Dhërmiu, ku vlera e një banesë arrin nga 190 000 deri në 258 000 lekë/m2.

Qeveria ka miratuar çmimet e reja mesatare të shit-blerjes së banesave në treg. Në raport me vitin 2023, çmimet janë rritur në qytetet e mëdha dhe në zonat bregdetare, të cilat nuk klasifikohen si qytete.

Kështu, në Tiranë për të gjithë zonat kadastrale, çmimi mesatar për m2, rezulton 124.300 lekë. Në rrethin brenda kryeqyetit, zona më e lirë është Paskuqani me çmim 62 500 lekë/m2, ndërsa më e shtrenjta është zona pranë liqenit artificial me çmim 227 400 lekë/m2. Por, përtej gjurmës së kryqetetit, Farkë mban çmimin më të lartë në të gjithë vendin, ku përreth liqenit të kësaj njësie administrative, çmimi i pronës arrin në 257 mijë lekë/m2.

Ndërkohë në Durrës, çmimi i ri mesatar i banesave arrin në 71.200 lekë nga 67.500 lekë/m2 në vitin 2023. Një prirje e ngjashme vihet re edhe në qendrat e mëdha të qarqeve të tjerë ku çmimi është rritur për një vit, deri në 14 mijë lekë/m2.

Sa i takon zonave bregdetare, çmimet i udhëheq Dhërmiu, ku një metër katror kushton afro 190 mijë lekë.

Përcaktimi i çmimit të pronave është referencë për zgjedhjen e qytetarëve e bizneseve në investim, Entin Kombëtar të Banesave në politikat e strehimit dhe qeverinë për politika fiskale.

Çmimi referencë i pronave në Tiranë, 2024

Çmimi mesatar

124.300 lekë/m2

Çmimi më i lartë Liqeni artificial 227 400 lekë/m2

Çmimi më i ulët Njësia 11 (pranë Paskuqanit) 62 500 lekë/m2

Zona më e shtrenjtë në Shqipëri

Njësia Farkë 257 mijë lekë/m2

Çmimi referencë i pronave në Shqipëri

Tiranë 124 300 lekë/m2

Durrës 71 200 lekë/m2

Vlorë 66 700 lekë/m2

Kamëz 62.500 lekë/m2