Vendosi tritol në banesën e Koçiljas, shpallet në kërkim autori (Emri)

Policia e Durrësit ka shpallur në kërkim shtetasin Florin Llana, si autorin e dyshuar të vendosjes së një sasie lënde eksplozive në banesën e Ilir Kociljas.

Ngjarja ndodhi rreth 6 ditë më parë, kur në dritaren e banesës së Koçiljas u vendos një sasi tritoli, e cila shkaktoi vetëm dëme materiale. Referuar hetimeve të Policisë, Llana është larguar me një automjet të marrë me qira, ndërsa ai akuzohet për shkatërrim prone.

“Zbardhet ngjarja e ndodhur më datë 26.02.2024, në lagjen nr. 3, ku një shtetas i paidentifikuar vendosi lëndë eksplozive në banesën e një shtetasi. Falë veprimeve të shpejta dhe profesionale hetimore, u bë i mundur identifikimi i shtetasit të dyshuar si autor i vendosjes së lëndës eksplozive.

Nga verifikimet e kryera rezulton se ky shtetas ka dalë nga Shqipëria, një ditë pas ngjarjes. Strukturat hetimore te Komisariatit të Policisë Durrës, pas një pune të thelluar hetimore, në drejtimin e Prokurorisë së Durrësit, bazuar në këqyrjen e kamerave dhe në inteligjencën policore, kanë bërë të mundur identifikimin e autorit të vënies së lëndës eksplozive në banesën në pronësi të shtetasit L. K., ku si pasojë e shpërthimit pati vetëm dëme materiale.

Nga veprimet e shpejta dhe profesionale hetimore, administrimi i provave në vendngjarje, si dhe këqyrja e kamerave, dyshohet se autori është larguar me një automjet të marrë me qira, drejt lagjes nr. 6.

Në vijim të veprimeve procedurale për këtë rast, u shpall në kërkim autori i dyshuar, shtetasi F. Ll., i dënuar më parë për ngjarje të tjera kriminale të ndodhura në qytetin e Durrësit.

Vijon puna intensive për kapjen e tij.

Materialet procedurale i kaluan Prokurorisë pranë Gjykatës së Shkallës së Parë të Juridiksionit të Përgjithshëm Durrës, për veprime të mëtejshme, për veprën penale “Shkatërrimi i pronës me eksploziv”, njoftoi Policia.

Koçilja ndodhet i arretuar për vrasjen me thikë të Halil Kokës, krim i ndodhur rreth 3 javë më parë në Durrës. Koçilja dhe Koka pas një debati mes tyre për parkimin u përfshinë në përleshje, ndërsa viktimë mbeti ky i fundit.