Gjykata e Durrësit ka vendosur të lërë në fuqi masën e sigurisë “Arrest në burg” për Feta Matajn, 44 vjeç, bashkëshortin e ish-drejtoreshës së Postës së Durrësit, Elisabeta Mataj.
44-vjeçari u arrestua pas denoncimeve të punonjëseve të filialit të Postës Shqiptare dhe administrimit të mesazheve telefonike të shkëmbyera mes dy bashkëshortëve. Sipas dëshmive të punonjëseve, Mataj dyshohet se u kërkonte nga 25 mijë lekë të rinj në muaj, duke ushtruar presion ndaj tyre përmes kërcënimit me humbjen e vendit të punës.
Në kuadër të hetimeve, Prokuroria ka ngritur dyshime se pesë punonjës që ushtronin detyrën e arkëtarit janë detyruar t’i jepnin nga 350 euro secili. Për këtë arsye, Mataj akuzohet për veprën penale “Shtrëngimi me anë të kanosjes ose dhunës për dhënien e pasurisë”, kryer në bashkëpunim.
Arrestimi i tij vjen në vijim të hetimeve për skandalin financiar në Postën e Durrësit, ku dyshohet se janë përvetësuar 69 milionë lekë të rinj nga fondet e destinuara për pagesat e pensioneve dhe ndihmës ekonomike në degët postare të Shijakut dhe Krujës.
Për këtë çështje, ish-drejtoresha Elisabeta Mataj u arrestua në muajin korrik, së bashku me dy punonjëse të tjera të institucionit, nën akuzën e përvetësimit të fondeve.
Pas më shumë se dy muajsh në paraburgim, masa e sigurisë ndaj Elisabeta Matajt u ndryshua dhe prej 25 shtatorit ajo ndodhet në “Arrest në shtëpi”.
Hetimet vijojnë për të sqaruar rolin e personave të përfshirë, mënyrën e përvetësimit të dyshuar të fondeve dhe pretendimet për shtrëngim të punonjësve në këmbim të ruajtjes së vendit të punës.
Discussion about this post