Pas arrestimit të presidentit Nicolás Maduro nga autoritetet amerikane, Gjykata e Lartë e Venezuelës ka urdhëruar që zëvendëspresidentja Delcy Rodríguez të marrë përkohësisht drejtimin e vendit.
Vendimi u njoftua në orët e para të së dielës dhe u lexua nga gjyqtarja Tania D’Amelio gjatë një seance të transmetuar nga televizioni shtetëror VTV. Sipas Gjykatës, Maduro ndodhet në një “paaftësi thelbësore dhe të përkohshme për të ushtruar detyrat e tij”, çka justifikon kalimin e kompetencave te zëvendëspresidentja.
Në urdhrin gjyqësor thuhet se Rodríguez do të ushtrojë të gjitha pushtetet dhe detyrat e presidentit të Republikës Bolivariane të Venezuelës, me qëllim garantimin e vazhdimësisë institucionale dhe funksionimit normal të shtetit.
Kushtetuta e Venezuelës parashikon që, në rast të mungesës së përkohshme ose përfundimtare të presidentit, detyrat e tij kalojnë automatikisht te zëvendëspresidenti.
Një ditë më parë, Nicolás Maduro u arrestua nga forcat amerikane në kuadër të një operacioni të urdhëruar nga presidenti i SHBA-së, Donald Trump. Autoritetet amerikane e akuzojnë Maduron për disa vepra të rënda penale, përfshirë komplot për narkoterrorizëm, import të kokainës në SHBA, prodhim dhe shpërndarje të lëndëve narkotike, si edhe përdorim dhe posedim të armëve të rënda gjatë veprimtarisë kriminale. Ai përballet gjithashtu me akuza për konfiskim pasurie.
Discussion about this post