Paolo Maldini nuk duroi më dhe i tregoi derën Gigio Donnarumma, i cili nuk pranoi të rinovonte kontratën me Milanin. Portieri i talentuar ndodhej në vitin e fundit të kontratës dhe është zyrtarisht lojtar i lirë.
E ardhmja e tij do të jetë sërish në Serie A. Titullari i kombëtares italiane është shumë afër kalimit te Juventusi. Në garë për shërbimet e tij janë edhe Barcelona e PSG, por agjenti Mino Raiola ka arritur akordin me bardhezinjtë.
Një rrogë prej 10 milion eurosh për Donnarumma, komision i majmë për menaxherin dhe kontratë për Antonio Donnarumma. Vëllai i Gigio do të luajë me ekipin U23 të Juventusit.
Ndërkohë, Max Allegri do të rikthehet si trajner te Juventusi. Vetëm zyrtarizimi ka mbetur, lajm që ka krijuar entuziazëm te talenti i portës. 22-vjeçari i ka dhënë “like” postimit që lajmëron rikthimin e Allegrit te Juventusi.
Një indicie që konfirmon faktin që “gardiani” do të jetë pjesë e Juventusit duke nisur nga sezoni i ardhshëm. Gjithsesi, Donnarumma, i cili konsiderohet si pasardhësi perfekt i legjendës Buffon, e ka fshirë pëlqimin e tij më vonë.
