Verë e vështirë/ Durrësit “i kullojnë djersët” nga mungesa e punëtorëve

Sezoni i verës është një ndër sezonet më problematike në vendin tonë për shkak të mungesës së punonjëse, kryesisht nëpër lokale.

Në Durrës, një prej qyteteve që pret mijëra turistë nga e gjithë bota gjatë verës, nuk po gjenden punëtorë. Ekspertët flasin për një krizë punonjësish, ndërsa si shkaktar kryesor ata thonë se është emigracioni.

Në dhjetëra biznese në Durrës, vërehen tabela përmes të cilave kërkohen punonjës. Punëtorë kërkohen edhe me banderola të mëdha të vendosura në rrugët e qytetit.

“Ne detyrohemi të punojmë vetë me dy turne duke përballuar dhe fluksin e qytetarëve,” thotë një punonjëse.

Ata që kërkojnë punë, kryesisht janë nën moshën që e përcakton ligji. Problematikat po vërehen në sektorin e turizmit, fasoneritë dhe ndërtim.

“Vijnë kërkesa por janë nën moshë dhe nuk mund ti punësojmë,” thotë ajo.

Shkaku kryesor sipas ekspertëve është emigracioni masiv.

“Problematikat e mungesës së fuqisë punëtore është diçka që vazhdon dhe kërkon një zgjidhje të paktën afatmesme. Për këtë arsye është shumë e rëndësishme që zgjidhjet të jenë disaplanshe, qoftë me prurje të huaja nga jashtë, por dhe me investimin profesional të të rinjve,” thotë një punëdhënës.