Kamionët e ministrit të Qeverisë së Kosovës, Goran Rakiq, bllokuan rrugët në veri për të penguar aksionin e Policisë së Kosovës. Kamionë të shumtë kishin bllokuar rrugën në Mitrovicë të Veriut, një javë më parë.
Kjo pas aksionit që Policia e Kosovës pati në disa qytete të Kosovës në luftim të kontrabandës, përfshirë edhe veriun. E këta kamionë që u vendosën për të penguar Policinë e Kosovës, i takojnë kompanisë pastrimi “Standard”, ku drejtor figuron ministri në Qeverinë Kurti, Goran Rakiq.
Në ditën e ngjarjeve në veri, një përgjigje për këtë i është kërkuar Ministrit të Punëve të Brendshme, Xhelal Sveçla. Ky i fundit u shpreh i habitur duke thënë se nuk ka informacion se ministri Rakiq ka një kompani. Sidoqoftë faqja e kompanisë pastrimi nuk e ka emrin e Rakiq si drejtor, por, emri i tij figuron në regjistra të ndryshëm të bizneseve në shtetin serb.
Goran Rakiq është një politikan serb i Kosovës i cili aktualisht është Ministër për Komunitete dhe Kthim në Qeverinë e Kosovës. Para kësaj, ai ka shërbyer si zëvendëskryeministër i Kosovës dhe si ministër i Administratës dhe Pushtetit Lokal.
