Ministrja e Arsimit dhe Sportit Evis Kushi ka reaguar e tronditur nga ngjarja e rëndë që ndodhi ditën e shtunë në Lushnje, ku një 13-vjeçar ka humbur jetën duke bërë video për në rrjetin social “Tik Tok”.
Ministrja shkruan se aksesi i fëmijëve në internet është alarmante, pasi ata marrin informacione të pakontrolluara, ndërsa heq përgjegjësinë nga vetja dhe drejton gishtin tek familjarët.
“Urgjente! Jam shumë e tronditur nga ngjarja e fundit e 13-vjeçarit në Lushnje! Aksesi i fëmijëve në internet për një kohë të gjatë dhe në burime apo informacione të pakontrolluara dhe të parekomandueshme për moshën e tyre është një nga çështjet që unë kam ngritur vazhdimisht në takime të ndryshme. Edhe para pak ditësh e ngrita si alarm në takimin e zhvilluar në kuadër të projektit “Shkolla për Shëndetin” ku theksova nevojën e një debati të gjerë publik për këtë emergjencë shoqërore. Jo vetëm shkollat dhe institucionet, por edhe familjet dhe çdo individ duhet të marrë sot përgjegjësinë për këto raste fatale”, shkruan Kushi.
Ngjarja e rëndë ndodhi ditën e djeshme, ku një 13-vjeçar u gjet pa shenja jete nga prindërit e tij. Kanë qenë shokët që kanë zbardhur shkaqet e këtij fataliteti, të cilët treguan se i mituri ishte përdorues i rrjetit social “Tik Tok”, ndaj dyshimet kryesore janë se ai po filmonte një video, që i mori dhe jetën.
Discussion about this post