Është zbardhur dosja hetimore për ngjarjen e rëndë të ndodhur mbrëmjen e 4 majit në Komisariatin e Kavajës, ku u vetëvra 31-vjeçari Ilvi Meta, i shoqëruar për vjedhje.
Në dosjen e siguruar nga gazetarja Klodiana Lala për “BË”, thuhet se për nevoja të hetimeve është bërë sekuestrimi i pamjeve filmike të kamerave të sigurisë në Komisariatin e Policisë Kavajë, ku ora e regjistrimit të kamerave të sigurisë është 5 minuta përpara me orën reale.
Në pamjet e regjistruara nga kamera e emërtuar me nr.1 “Sheshi Komisariatit”, duket në hyrjen e derës së ambienteve të Komisariatit të policisë Kavajë, shtetasi Ilvi Meta me kapele dhe xhup shumëngjyrësh i shoqëruar nga agjentët e policisë kriminale, duke zbritur nga mjeti furoistradë në përdorim të policisë kriminale pranë Komisariatit Kavakë, data 4 maj ora 10:38. Personi me kapele është shtetasi Ilvi Meta. Ora 10:42 shtetasi Ilvi Meta hipën sërish në mjetin e policisë kriminale. Ora 11:00, mjeti i policisë kriminale ndalet te hyrja e godinës dhe zbret Ilvi Meta së bashku me agjentët e policisë kriminale.
Në pamjet e regjistruara nga kamera e emërtuar me nr.2 “Holli i Komisariatit” duket në hyrjen e godinës mjeti tip fuoristradë në përdorim të policisë kriminale që ndalon në orën 10:38. Shtetasi Ilvi Meta shihet në pamje me një xhup me ngjyra, i paprangosur, duke komunikuar dhe i qetë; ora 10:42, shtetasi Ilvi Meta së bashku me punonjësit e policisë dalin sërish nga godina dhe nisen drejt mjetit fuoristradë; në orën 11:00 Ilvi Meta kthehet me fuoristradën dhe agjentin e policisë;
Ora 11:06, Ilvi Meta shoqërohet te korridori te dhomat e shoqërimi; Ora 16:11 shfaqet Ilvi Meta duke u kthyer nga dhoma e shoqërimit në shoqërinë e një punonjësi të policisë së rendit.
Në pamjet e regjistruara nga kamera e emërtuar me nr.5, “Korridori dhomat e sigurisë nr.2” shihet momenti kur fusin në dhomat e izolimit shtetasin Ilvi Meta pasi është ekzekutuar vendimi i gjykatës, shtetasi nuk duket të ketë asnjë shqetësim dhe i bëhet kontroll fizik nga punonjësi i policisë Rushit Kola.
Momenti kur i hiqet kapelja shtetasit Ilvi Meta nga punonjësi i policisë Rushit Kola. Shtetasi Ilvi Meta kthehet me fytyrë nga muri që të kontrollohet fizikisht dhe nuk ka asnjë moment tensioni ndërmjet viktimës dhe punonjësve të policisë. Ilvi Meta mban në duar letra) si procesverbalet e ekzekutimit të vendimit të gjykatës).
Nga ora 16:26 që shfaqet në korridorin e dhomave të sigurisë shtetasi Ilvi Meta deri në përfundimin e kontrollit të ushtruar nga punonjësi i policisë Rushit Kola, ora 16:27 kalojnë 32 sekonda kontroll personal i ushtruar nga punonjësi i policisë ndaj të ndaluarit.
Më pas në orën 19:12 punonjësi i policisë Rushit Kola shfaqet duke dalë nga dhoma ku qëndrojnë prokurori dhe OPGJ gjatë marrjes në pyetje dhe vazhdon nëpër korridor duke kontrolluar fillimisht derën nr.1 dhe më pas derën numër 2 ku ishte Ilvi Meta. Pasi konstaton se diçka nuk shkonte punonjësi i policisë i ka rënë alarmit dhe sërish afrohet te dhoma e të arrestuarit Ilvi Meta. Pas disa momentesh vjen oficeri i sallës operative me çelësa për të hapur dyert. Pasi konstaton trupin, oficeri i rojës del për të kërkuar ndihmë dhe më pas vijnë punonjësit e patrullës për të ndihmuar në transportimin e tij për në spital me qëllim dhënien e ndihmës mjekësore shtetasit Ilvi Meta./ Balkanweb
Discussion about this post