Taulant balla, ministër i Brendshëm, komentoi sot vetëvrasjen e nënkomisarit Arben Pjeçi, specialist i krimeve në Drejtorinë e Policisë së Durrësit, ngjarje e ndodhur në ambientet e Komisariatit të Policisë në qytetin bregdetar.
Balla shprehu ngushëllimet për familjen dhe keqardhjen që 57-vjeçari “nuk i dha mundësinë për të marrë në konsideratë një ankesë prej tij”. Ai po ashtu tha se për rastin po bëhen verifikimet përkatëse.
“Jo vetëm që kam një koment, më shumë se kaq, kam një ngushëllim për familjen. Prej atij momenti të parë, bashkë me Drejtorin e Përgjithshëm, kemi bërë të gjitha verifikimet tona, edhe si koleg, por edhe si qytetar, se kush janë shkaqet që e kanë çuar në atë vendim. Të them të drejtën nuk na dha mundësinë që ta merrnim në konsideratë një ankesë prej tij, qoftë për faktin që Policia e Shtetit ka qenë e detyruar të zbatojë një vendim gjykate. Ju e dini që kjo është një çështje që brenda nesh ka disa verifikime. Drejtori i Përgjithshëm i Policisë po bën verifikimet e veta, AMP po bën verifikimet e veta”, tha Balla.
Specialisti i krimeve të rënda, Arben Pjeçi u vetëvra mesditën e së enjtes brenda ambienteve të Komisariatit të Policisë Durrës. Babai i dy fëmijëve me një karrierë të gjatë 35-vjeçare në radhët e policisë dyshohet se i dha fund jetës në kushte të rënduara psikologjike, për shkak se kishte një vendim për ta larguar atë nga detyra, kjo për shkak të përfshirjes së tij në një sherr.
Për ngjarjen e rëndë është ngritur dhe një grup i posaçëm hetimor, në drejtimin e Prokurorisë së Durrësit dhe oficerëve të Policisë Gjyqësore të Prokurorisë.
Discussion about this post