Një ngjarje tragjike ka tronditur opinionin publik në Itali dhe Shqipëri: një emigrant maroken, Hamid Badoui, 42 vjeç, është vetëvrarë në burgun e Torinos, vetëm pak ditë pasi ishte kthyer nga qendra e Gjadrit në Shqipëri, ku kishte qëndruar për afro një muaj.
Sipas mediave italiane, Badoui i dha fund jetës duke u varur me lidhëset e këpucëve në qelinë e tij. Ai ishte arrestuar menjëherë pas kthimit në Itali dhe në një takim me avokatin, kishte shprehur ankth dhe frikë të thellë për mundësinë e rikthimit në qendrën e Gjadrit, që sipas tij ishte më e keqe se burgu.
“Më mirë në një burg sesa në atë CPR”, – mësohet të ketë thënë ai, duke iu referuar qendrës për refugjatë në Gjadër.
Hamid Badoui kishte jetuar për 13 vite në Piemonte, por për shkak të varësisë nga droga dhe disa vjedhje të vogla, iu refuzua azili dhe përfundoi në Gjadër me urdhër dëbimi.
Ngjarja ka shkaktuar reagime të ashpra nga opozita italiane dhe organizatat e të drejtave të njeriut. Amnesty International Italia kritikoi ashpër modelin e qeverisë Meloni për trajtimin e emigrantëve, duke deklaruar se “modeli Meloni sjell vuajtje dhe vdekje”.
Kjo ngjarje ngre pikëpyetje serioze për standardet e trajtimit të emigrantëve në qendrat e ndalimit të ngritura në kuadër të marrëveshjes Itali–Shqipëri, dhe për pasojat psikologjike që këto kushte po shkaktojnë tek personat e prekur.
Discussion about this post