Vetingu – KPK jep vendimin për prokurorin e Tiranës

Prokurori i Tiranës, Afrim Shehu është konfirmuar në detyrë. Vendimi u dha këtë të mërkurë nga Komisioni i Pavarur i Kualifikimit.

Të hënën më 13 maj ai u përballë me KPK, gjatë seancës dëgjimore, teksa dha shpjegime dhe kundërshtoi bilancin negativ në vlerë të madhe, të konstatuar para dhe pas fillimit të detyrës. Subjekti dha gjithashtu shpjegime për disa nga denoncimet e depozituara nga qytetarët.

Procesi i rivlerësimit për prokurorin Shehu u krye nga trupa e KPK-së, e kryesuar nga Xhensila Pine, me relatore Alma Faskaj dhe anëtare Pamela Qirkon. Në cilësinë e vëzhguesit ndërkombëtar ishte i pranishëm Francesco Ciardi.

Afrim Shehu ka punuar si oficer i Policisë Gjyqësore dhe si avokat përpara se të emërohej prokuror i Republikës së Shqipërisë në vitin 2009. Për gati një dekadë ai punoi si prokuror pranë Prokurorisë së Durrësit, ndërsa në qershor të vitit 2023 u transferua në Prokurorinë e Tiranës përmes procedurës së lëvizjes paralele.