Kolegji i Posaçëm i Apelit njoftoi këtë të premte rikthimin në detyrë të prokurores Antoneta Sevdari, të shkarkuar nga procesi i vetingut. Sevdari kaloi shkallën e parë të vetingut, por u shkarkua në Apel.
Sevdari ankimoi vendimin në Gjykatën Europiane të drejtave të njeriut, që vendosi rishikimin e vendimit.
“Jam e emocionuar, është ditë shumë e rëndësishme për mua profesionalisht dhe personalisht. Ndihem e gëzuar që më në fund arrita të marr drejtësinë që vlerësoj që e meritoj. Sot është dita e drejtësisë dhe unë e ndiej dyfish përgjegjësinë që në vazhdim të mbetem e përkushtuar në shërbim të saj”, tha e emocionuar prokurorja pas vendimit, në një prononcim për mediat.
Vendimi i Strasburgut
Në muajin mars, si asnjëherë tjetër që nga nisja e procesit të vetingut në drejtësi, Kolegji i Posaçëm i Apelit, vendosi të rishikojë një vendim të dhënë prej tij për përjashtimin e një prokurori nga sistemi.
Ndonëse vendimet e KPA janë të formës së prerë dhe të paankimueshme, në rastin prokurores Antoneta Sevdari, rishikimi i vendimit ishte një detyrë e caktuar shtetit shqiptar nga Gjykata Europiane e të Drejtave të Njeriut në Strasburg.
Vendimi i Strasburgut, që i hapi rrugë rigjykimi të çështjes “Sevdari” në KPA, u shpall më dhjetor 2022. Gjykata Europiane tha se shkarkimi nga detyra i Sevdarit ishte disproporcional me problemet e vërejtura në pasurinë e siguruar nga bashkëshorti para martesës.
Në të njëjtin vendim, Strasburgu detyroi shtetin shqiptar të dëmshpërblejë Sevdarin dhe kompensojë shpenzimet gjyqësore në një total prej 24 600 euro.
Shkarkimi nga Vetingu
Prokurorja Sevdari kaloi pa probleme në Komisionin e Pavarur të Kualifikimit, por Komisioneri Publik deklaroi se vendimi i Shkallës së Parë është marrë pa u bërë fillimisht një hetim i thelluar të paktën në dy kritere.
Pasuria e bashkëshortit të saj solli edhe verdiktin final. Kolegji i Posaçëm i Apelimit deklaroi si të pamjaftueshëm justifikimin e pasurisë së saj dhe të bashkëshortit, i cili ka jetuar në Arabinë Saudite, burime që për një pjesë kanë shmangur tatimet.
Për sa i përket aftësive profesionale, Kolegji vendosi të mos nisë hetime për 10 denoncimet e ardhura ndaj saj, sepse nuk përmbajnë fakte dhe rrethana të mjaftueshme.
Kolegji vendosi se Sevdari “ka cenuar besimin e sistemit të drejtësisë”, duke ndryshuar në këtë mënyrë vendimin e një viti më parë të KPK-së.
Discussion about this post