Komisioni i Pavarur i Kualifikimit, KPK shpalli këtë të mërkurë vendimet e shkarkimit nga detyra të prokurorëve Ornela Rrumbullaku dhe Dashnor Nure.
Vendimi për shkarkimin e prokurores së Tiranës, Ornela Rrumbullaku u mor nga trupa e KPK e kryesuar nga Pamela Qirko, me relatore Alma Faskajn dhe anëtare Xhensila Pinen. Prokurorja e Tiranës u përlot pasi trupa gjykuese shpalli vendimin.
Gjatë seancës dëgjimore të hënën, Rrumbullaku dha shpjegime për bilancet negative në vlera të mëdha të konstatuara në burimin e krijimit të aksioneve të bashkëshortit në disa shoqëri private.
Ajo i kundërshtoi gjetjet e KPK-së, duke pretenduar se bashkëshorti nuk i kishte investuar ato para, por ishte dakordësuar me ortakët që të kontribuonte me konsulencë juridike.
Rrumbullaku u vlerësua pozitivisht për pastërtinë e figurës si dhe nuk u evidentuan probleme domethënëse në kriterin profesional.
Ornela Rrumbullaku përfundoi studimet e Magjistraturës në vitin 2006 dhe pas një periudhe stazhi në Prokurorinë e Tiranës, u emërua në Prokurorinë e Rrethit Kavajë. Në vitin 2019, Rrumbullaku u komandua si këshilltare pranë Këshillit të Lartë të Prokurorisë. Deri në momentin e shkarkimit nga detyra ajo e ushtron funksionin në Prokurorinë e Juridiksionit të Përgjithshëm në Tiranë.
Ndërsa për prokurorin e Korçës Dashnor Nure vendimi u mor nga trupa e KPK e kryesuar nga Pamela Qirko, me relatore Xhensila Pinen dhe anëtare Alma Faskajn.
Deklarimet kontradiktore të prokurorit Dashnor Nure për adresat e banimit, kanë shtyrë Komisionin të hetojë për krijimin e një banese nga vëllezërit dhe një apartamenti nga motra, në të cilat ai ka deklaruar se ka jetuar përreth dy dekada.
Pamundësitë financiare të konstatuara ndër vite, gjatë seancës dëgjimore, prokurori Nure i konsideroi si virtuale dhe jo realitet.
Discussion about this post