Albert Murçaj, do të jetë drejtuesi i ri i Prokurorisë pranë Gjykatës së Shkallës së Parë, në Shkodër. Prezantimin e ka bërë ditën e sotme Kryetari i Këshillit të Lartë të Prokurorisë, Gent Ibrahimi i shoqëruar nga anëtari i Këshillit Vatë Staka.
Me vendim të Këshillit të Lartë të Prokurorisë, Murçaj u caktua në këtë pozicion përmes procedurës së ngritjes në detyrë gjatë mbledhjes plenare të një dite më parë. Gent Ibrahimi vuri në dukje se sistemi i prokurorisë, aktualisht, është në ditë të vështira, për shkak të largimeve nga procesi i vettingut, çka ka sjellë si pasojë dhe rritjen e ngarkesës së prokurorëve.
Ai gjithashtu siguroi të pranishmit se Këshilli i Lartë i Prokurorisë po ndërton një sistem vlerësimi të prokurorëve, i cili do të garantojë karrierën e tyre, bazuar kryesisht tek meritokracia.
Ibrahimi theksoi faktin se prokuroritë kanë nevojë për një sistem elektronik të menaxhimit të çështjeve, i cili do të lehtësonte dhe përshpejtonte punën e organit e hetimit në tërësi. Nga ana e tij, Albert Murçaj, falënderoi Ibrahimin dhe Këshillin për vlerësimin, duke u shprehur me këtë rast se problematikat, me të cilat përballen sot zyrat e prokurorisë, duhen trajtuar sa më shpejt, pasi prokurorët duhet të ndihen të qetë se puna e tyre vlerësohet dhe garantohet.
