Ashtu si gjyqtarët dhe prokurorët, edhe noterët në Shqipëri do t’i nënshtrohen një procesi vetingu që do të kryhet nga ministria e Drejtësisë. Lajmin e ka bërë të ditur ministri i Drejtësisë, Ulsi Manja, i cili tha se Këshilli i Ministrave ka miratuar sot projkeligjin i cili do të dërgohet në Kuvend për diskutim dhe parashikon kritere të reja për pranimet në sistemin e noterisë. Ky projektligj do të ketë parasysh nxjerrjen jashtë këtij sistemi të noterëve që gjenden në kontakte të papërshtatshme me krimin e organizuar apo me të dënuar për vepra të rënda.
“Në kriteret e reja që përcakton ligji, pjesë e shërbimit të noterisë s’mund të jenë, s’mund të bëhen dhe nuk do jenë as noterët që janë në listën e personave të shpallur sipas ligjit më fuqi në kuadër të masave kundër pastrimit të parave dhe financimit të terrorizmit”, tha Manja.
Pas mbledhjes së qeverisë, Manja sqaroi se është Ministria e Drejtësisë që nëpërmjet inspektimeve të planifikuara dhe hetimeve do të bëjë filtrin e këtij sistemi.“ Ligji për noterinë” që është i 2019 ka përcaktuar edhe mekanizimit të filtrimit të këtij shërbimi. Është Ministria e Drejtësisë që nëpërmjet inspektimeve të planifikuara dhe hetimeve proaktive që do ta bëjë filtrin e këtij sistemi. Është një shërbim i deleguar por përgjegjëse për ketë shërbim është Ministria e Drejtësisë”, u shpreh ministri.
Ai shtoi se nuk ka asnjë mbivendosje me bashkëqeverisjen, por bashkëqeverisja do të jetë një nga burimet e informacionet për strukturën anti-korrupsion.
Discussion about this post