Deputeti Dashamir Shehi e sheh si të nevojshëm ngritjen e një vettingu për politikanët. Përmes një interviste televizive ai tha se duhet të fillojë një proces i tillë, por të jetë i menduar dhe hartuar mirë. Ndërsa shtoi se, së pari vettingu duhet të fillojë nga Basha dhe të vazhdojë me shefat e tjerë. Sipas tij, shqiptarët e dinë se kush janë të korruptuar, tani ka ardhur koha që ata të vihen para përgjegjësisë.
“Procesi është i rëndësishëm, është i drejtë, shpresoj që të fillojë nga Basha dhe shefat. Besoj se shqiptarët e dinë kush janë të korruptuarit. Kam frikë se disa mund të certifikohen si të pa korruptuar, ndërsa pasurimi i politikanit raporti me gjënë publike është diçka e verifikueshme në jetën e përditshme. Ai që ka qenë i ndershëm 20 vjet para nuk është më”, tha ai.
Nga ana tjetër, Shehi tha se këtë vetting nuk mund ta drejtojë SPAK, sepse nuk duhet mbingarkuar ky institucion që merret edhe me çështje të tjera të mëdha. Ndërsa sqaroi se, për këtë çështje duhet ngritur një strukturë e mirëfilltë.
“Nuk jam për SPAK, se 15 veta aty të na bëjnë nja 4 punë që presim se sa t’i hyjnë batakut të madh. E mbështet si qëllim, si formulë hajde ta diskutojmë. SPAK ça do bëjë më përpara? Po i ngarkojmë këto struktura. Ideja është që SPAK do na zgjidhë këto hallet e mëdha dhe po ta ngarkojmë me këtë çështje të shkallës administrative, ne deklarojmë pasurinë, nëse ka çështje penale SPAK aty është. Ne kemi akoma prokurori e hetues, shteti i ka të gjitha veglat për tu marrë me këtë punë. Jam dakord me qëllimin e mirë! Nuk jam dakord të përziejmë gjithë gjerat bashkë”, tha ai.
Kërkesa e PD për ngritjen e vettingut ndaj politikanëve ka shkaktuar shumë reagime, ndërsa kryedemokrati është vetëofruar që të jetë ai i pari që do kalojë në atë proces.
