Kryeministri Edi Rama ka reaguar për herë të parë për situatën e krijuar në Krujë ku qindra qytetarë u helmuan nga uji i pijshëm. Duke folur për mediat pas përfundimit të mbledhjes së drejtuesve politikë të qarqeve, Rama tha se qeveria ka bërë investimin dhe se ndërmarrja për mirëmbajtjen është përgjegjëse për të.
Ai gjithashtu tha se të bësh investimin dhe të sigurosh që uji është në parametrat e duhur janë gjëra të ndryshme.
“Nuk duhej ndërtuar ujësjellësi të ri sipas jush? Apo ka sjellë këtë problem? Të ndërtosh një të ri është një gjë dhe të shikosh se uji ka shkuar nëpër shtëpia është një gjë dhe të shikosh parametra është një gjë tjetër. Qeveria ka bërë investimin, ndërmarrja ka detyrime të tjera. Kjo është një gjë nën hetim administrative për të kuptuar çfarë ka ndodhur. Është njësoj sit ë thuash që pas rindërtimit të rrugës së re është rritur numri i aksidenteve për shkak të shpejtësisë, e ka fajin rruga apo shoferi?” – është shprehur Rama.
Kujtojmë se numrin i personave të shtruar në spitalin e Krujës nga helmimi, ka shkuar në 541 persona.
Vettingu i politikanëve, kryeministri Rama i përgjigjet PD-së: Gati të ulemi në tryezë
Pas mbledhjes me krerët e degëve të PS, kryeministri Edi Rama foli për herë të parë për propozimin e kryedemokratit, Lulzim Basha për vettingun e politikanëve.
Nga selia rozë, kryeministri tha se pranon të ulet në tryezë me opozitën, për të dëgjuar argumentet e tyre, për të dhënë argumentet e tij, për të marrë mendimin e ekspertëve të fushës dhe në fund për të nxjerrë konkluzione.
“Nuk kam shprehur opinion të drejtpërdrejtë, por kemi një parim, ne jemi të hapur të diskutojmë çdo gjë. Do ulemi për çdo gjë që opozita propozon. Në 2018 ka pasur një propozim, por ai propozim ka qenë jo bindës. Nuk dimë gjë për propozimin e ri. Kanë kaluar 3 vite. Nëse ka argumente bindës do të bëjmë më të mirën.
Nuk kam asnjë opinion personal pasi duhet të respektoj parimin që jemi të hapur të diskutojmë pa paragjykuar asgjë. Kemi argumentet tona dhe i ballafaqojmë në rast se shohim interes për vendin nuk ka rëndësi nga vjen propozimi sa i përket vettingut të politikanëve. Nuk bëhet dialogu ne televizor me mikrofonët para” – është shprehur Rama.
