Në një intervistë për mediat, Shehi tha se është dakord të ketë vetting për politikanët. Ai është shprehur se e mira e gjithë kësaj iniciative është që të dënohet dikush dhe të bëhet shembull, pasi korrupsioni është galopant.
“Jam dakord të ketë një veting për politikanët me këtë lloj korrupsioni galopant, njerëz që kanë hyrë në politikë pa asnjë pronë dhe sot kanë miliona. Jam dëshmitar prej 30 vitesh. Unë jam me të dyja duart që të kemi mundësi të pastrojmë një pjesë të politikanëve, por nëse dikush dënohet, bëhet shembull. Unë do të doja të shikonim se çfarë kanë menduar dhe të gjithë të mbërrinim në atë formulë që do të ishte më e mira, nivelit të propagandës, të korruptuar ka sa të duash. Të dënohet dikushi, t’i sekuestroheshin pasuritë. Them që shpesh herë e bërë me shpejtësi dhe pa u diskutuar. Nuk më pëlqen ideja që do ta bëjë SPAK. Po e ngarkojmë SPAK-un me çështje që mund të jenë të natyrës administrative. Kur themi për politikanët do fillojmë nga fillimi fare. Se nuk janë 140 deputetë. Bëhen rreth 1 mijë veta, dhe nuk besoj se SPAK-u nuk është në gjendje ta bëjë” – është shprehur Shehi.
Shehi gjithashtu foli edhe për amendamentet kushtetuese të propozuara nga PD, duke thënë se duhet një ligj zgjedhor dhe se kjo punë do vullnet politik.
“Sigurisht qe PD ka problemet e veta, por aksioni politik i opozitës nuk duhet të ndalojë. Duhet të bëjmë një ligj zgjedhor. Që temat e mëdha të mos diskutohen 2 javë para zgjedhjeve, por dy jave pas zgjedhjeve. Asnjëherë nuk e kanë filluar me seriozitet për t’u bërë. Kjo punë nuk do para, do vullnet politik. Përfunduam këtu ku ishim dhe përfituesi i vetëm ishte Edi Rama”, shtoi ai.
Më tej ai komentoi edhe deklaratat e fundit të kreut të PD Basha, duke u shprehur se është e vërtet se ka një “llum të tranzicionit”, ndërsa shtoi se ditët e fundit kryedemokrati ka pasur disa lëvizje kurajoze, siç është ajo e denoncimit të oligarkëve me emra.
