Si pasojë e shkarkimeve nga Vettingu, gjykata e apelit të Korçës po përballet me një situatë kaotike nga mungesa e gjyqtarëve e cila përkthehet në vonesa për çështjet në gjykim.
Vonesat kanë përfshirë edhe gjykatën e shkallës së parë. Aktualisht në këtë gjykatë ushtrojnë funksionin 4 gjyqtarë nga 14 që duhet të ketë mes tyre edhe kryetarja e gjykatës e cila gjykon një numër të kufizuar çështjesh. Vettingu por edhe arsye të tjera mes të cilave transferime apo ndarje nga jeta e gjyqtareve kanë bërë që gjyqësori i Korçës të shkojë drejt kolapsit.
Ngarkesa e gjyqtarëve nga ana tjetër rrezikon edhe vendime te padrejta dhe në të gjitha rastet të dëmtuar mbeten qytetaret të cilët duhet të presin vite të tëra për të gjetur drejtësi ndërsa edhe kjo e fundit mund të shoqërohet me vendime të gabuara.
Përfaqësues të Dhomës së Avokatisë ngrenë shqetësimin se në këto kushte një qytetari që kërkon drejtësi mund t’i duhen deri në 5 vite për një çështje. Kur 4 gjyqtarë nuk mjaftojnë as për gjykimin e çështjeve më emergjente përfaqësuesit e Dhomës së Avokatisë apelojnë qe nga njëra anë qytetarët të shmangin çështjet civile dhe të gjejnë vetë zgjidhje ndërsa nga ana tjetër kërkojnë që të gjenden zgjidhje alternative dhe të shmanget mungesa e drejtësisë për qytetarët.
