334 shoferë janë ndëshkuar, pasi janë kapur në shkelje nga Makina inteligjente e cila përdoret nga policia për të monitoruan qarkullimin. Sipas policisë, gjatë orëve të mbrëmjes në disa rrugë të kryeqytetit shoferët janë kapur me shpejtësi tej normave të lejuara, pa rrip sigurimi apo duke përdorur celularin.
Sipas njoftimit të policisë, 54 drejtues mjetesh u është pezulluar leja e drejtimit, nga të cilët: 39 drejtues mjetesh janë evidentuar me shpejtësi deri në trefish mbi normën e lejuar në rrugët e brendshme të kryeqytetit dhe 15 të tjerë me shpejtësi mbi 30 km/h deri në 60 km/h më shumë se tabela e lejuar, në Unazën e Re dhe në rrugët interurbane.
Gjithashtu, nga verifikimi ka rezultuar se 86 drejtues mjetesh, krahas shpejtësisë, ishin duke përdorur edhe celularin gjatë drejtimit të mjetit, ndërsa 44 drejtues të tjerë, krahas shpejtësisë, janë evidentuar edhe pa rrip sigurimi.
Ndërkohë, të gjitha rrugët nacionale dhe urbane në të gjithë vendin po monitorohen me patrulla të lëvizshme të Policisë Rrugore, duke përdorur radarë, dragera, dronë, makina të paloguara, kamera e aparate fotografike.
