Ish-Kryeministri, Sali Berisha, po zhvillon një takim më demokratët në Shkodër, në kuadër të fushatës elektorale për zgjedhjen e kreut të PD. Ai i ka falënderuar shkodranët për besimin që kanë te Rithemelimi dhe tha se përmes votës në 6 mars ata shpëtuan PD nga ai që e kishte marrë peng. Berisha tha se shqiptarët janë një komb që kanë vuajtur nga diktaturat dhe autokracitë më të egra, ndaj dhe ato treguan përpjekje epike kundër autokracisë dhe kallp opozitës. Ndërsa theksoi se pseudo-opozita ka marrë fund dhe PD do të ecë përpara.
“Një qeveri e cila disponon mjete të jashtëzakonshme të paligjshme, një qeveri në dhunim të standardeve dhe normave demokratike ka vendosur të çimentojë pushtetin e saj, një pseudo-opozitë që është shndërruar në freskore të Qeverisë u angazhua në lojërat e saj, një drejtësi e kontrolluar tërësisht nga Qeveria u vu në shërbim të goditjes së opozitës së vërtetë. Por demokratët, pavarësisht nga shantazhet, presionet dhe kërcënimet, këtu në Shkodër i qëndruan besnik idealeve të tyre, dhe votuan midis opozitës së vërtetë, pseudo-opozitës dhe PS-së, kandidatin Bardh Spahia”, tha Berisha. Ai theksoi se PD ka kaluar momente shumë kritike, por vota juaj e 6 marsit ishte shpëtimtare për Partinë Demokratike.
Discussion about this post