VIDEO/ ‘Bravo çuna’, gëzim në Palermo pas arrestimit të mafiozit

Arrestimi në Palermo i bosit mafioz Matteo Messina Denaro ka sjellë festë në Palermo.

Në këto video të publikuara nga ANSA duket qartë gëzimi i qytetarëve që falënderojnë dhe përqafojnë policët në rrugë. Ata duartrokasin dhe filmojnë me celular çdo moment, duke falenderuar karabinierët ‘del Ros’ që kryen këtë superaksion.

Operacioni për kapjen e Bruscas

Ky imazh, sipas mediave italiane kujton transferimin në burg të Giovanni Brusca, vrasësi më i kërkuar, i arrestuar në vitin 1996. Me atë rast ka qenë Policia e Shtetit që ka kryer operacionin. Më pas shpërthyen nga gëzimi si agjentët që e kapën ashtu edhe qytetarët që prisnin jashtë komisariatit.

Sot Anti-Mafia Italiane arrestoi pas 30 vitesh në kërkim bosin e mafias famëkeqe Cosa Nostra, Messina Denaro. Ai u arrestua në një klinikë private në Palermo. Ai ishte duke marrë trajtim rreth orës 09:00, kur karabinierët zbarkuan dhe mbi 100 policë u përfshinë në arrestimin e tij.

Messina Denaro

Messina Denaro është dënuar dhe gjykuar në mungesë për një sërë vrasjesh, përfshirë edhe ekzekutimin e dy prokurorëve të antimafias, Giovanni Falcone dhe Paolo Borsellino në vitin 1992. Skeda e tij kriminale vazhdon me të tjera ngjarje të rënda si sulmet me bomba vdekjeprurëse të vitit 1993 në Milano, Firence dhe Romë, dhe rrëmbimin, torturimin dhe vrasjen e djalit 11-vjeçar të një mafiozi që ishte kthyer në të penduarin e drejtësisë.

Denaro  mbikëqyri gjithashtu shantazhin, hedhjen e paligjshme të mbeturinave, pastrimin e parave dhe trafikun e drogës për sindikatat e fuqishme të krimit të organizuar Cosa Nostra. Ai thuhet se ishte i mbrojturi i Totò Riina, kreut i klanit Corleone, i cili u arrestua në vitin 1993 pas 23 vitesh në arrati. Edhe arrestimi i Denaro është bërë në të njëjtën datë. Por edhe pse në arrati, aktiviteti i Denaro vazhdonte ku mendohet se ai jepte urdhra vartësve të tij nga vende sekrete për ekzekutime dhe trafiqe.