Policia e Kavajës arrestoi 3 persona, dy prej të cilëve vëllezër, pasi dyshohet se kanë dhunuar dhe kanë mbajtur peng një 22-vjeçar.
Shkak për ngjarjen ishin dyshimet që kishin të arrestuarit se 22-vjeçari i kishte mashtruar për të shitur një automjet me vlerë 4000 euro.
Gjithashtu policia arrestoi edhe 22-vjeçarin për dyshime për mashtrim, si dhe sekuestroi automjetin për shitjen e të cilit dyshohet se ka mashtruar.
Policia përmes një njoftimi zyrtar bën të ditur se ka finalizuar operacionin e koduar “Preteksti”, ku u arrestuan shtetasit: K. D., 32 vjeç dhe E. D., 34 vjeç, të dy banues në Tiranë (vëllezër), si dhe i shtetasit R. Sh, 25 vjeç, banues në Durrës.
“Nga këto veprime dyshohet se këta 3 shtetas, në bashkëpunim me njëri-tjetrin, kanë marrë me forcë në një automjet, shtetasin Xh. D., e kanë dhunuar atë dhe i kanë hequr lirinë për disa minuta, pasi pretendonin se ky shtetas kishte mashtruar shtetasin R. Sh., për t’i shitur një automjet me vlerë 4000 euro, të cilin e kishte marrë me qira, nga shtetasit K. D. dhe E. D.
Në kuadër të këtij operacioni u arrestua edhe shtetasi Xh. D., 22 vjeç, banues në Durrës, si autor i dyshuar i këtij rasti mashtrimi.
Në cilësinë e provës materiale u gjet dhe u sekuestrua automjeti për të cilin dyshohet se ka mashtruar shtetasi Xh. D.
Materialet procedurale i kaluan Prokurorisë pranë Gjykatës së Shkallës së Parë të Juridiksionit të Përgjithshëm Durrës, për veprime të mëtejshme”, njoftoi policia.
Discussion about this post