“Ëndrra europiane përfundon këtu”. Ishte kjo banderola e shkruar në anglisht që mbanin në duar protestues këtë të mërkurë në Shëngjin, kur mbërriti edhe anija e parë me emigrantët që do zhvendosen në kampin-burg.
Protesta u organizua përpara hyrjes së kampit, ku banorët e zonës u mblodhën me pankarta dhe thirrje kundër marrëveshjes Rama-Meloni, që parashikon strehimin në këtë qendër të refugjatëve që kapen në Mesdhe nga autoritetet italiane. Në një prej tyre, kryeministrat Rama dhe Meloni shfaqen si gardianë burgu.
Banorët shprehën pakënaqësitë e tyre në lidhje me faktin se vendimi për ndërtimin e kampit në Lezhë nuk është marrë në konsultim me ta. Sipas tyre, kjo vendimmarrje po rrezikon sigurinë dhe stabilitetin e komunitetit lokal.
Marrëveshja ka marrë kritika edhe nga përtej detit. Opozita dhe mediat italiane, përveçse e konsiderojnë një “Guantanamo” kampin në Lezhë, kanë ngritur shqetësime edhe për shpenzimet e kripura që do të paguajë qeveria italiane. Shqetësime për liritë e refugjatëve që do të vendosen në qendrën e Lezhës kanë shprehur edhe organizata ndërkombëtare.
Sipas mediave italiane, në bordin e anijes që zbaroi sot në Shqipëri janë 16 persona, 10 nga Bangladeshi dhe 6 nga Egjipti. Ata ndodheshin në disa gomone të vogla të nisura nga brigjet libiane dhe u kapën mbrëmjen e së dielës në ujërat ndërkombëtare nga autoritetet italiane. Këta të fundit i transferuan emigrantët në anijen e marinës ushtarake “Libra”.
Në bordin e saj, emigrantët iu nënshtruan një kontrolli paraprak për të verifikuar nëse i plotësonin kërkesat e paracaktuara: të jenë meshkuj, të ardhur nga vende të sigurta dhe jovulnerabël.
Lexo edhe:
Refugjatët e parë në Shqipëri, KE: Marrëveshja Rama-Meloni e jashtëligjshme
Discussion about this post