Vijon dita e dytë e aplikimit për skemat mbështetëse në bujqësi. Sërish “kryefjala” janë radhët e gjata, të cilat janë krijuar që në orët e para të mëngjesit. Hapja e disa sporteleve që ofrojnë shërbim për bujqve nuk i ka shmangur radhët. Kjo pasi shumë kanë hasur vështirësi në përdorimin e portalit ku bëhet aplikimi.
“Që në orën 8 e gjysmë kam ardhur, s’kam mbaruar punë vetëm një vërtetim kam marrë, s’ka sqarim as për një gjë,” – u shpreh një qytetare.
“Është shumë e vështirë të rrish në këmbë këtu gjithë ditën dhe mos të sqarohesh. Nuk i bëjmë dot aplikimet,” – tha një tjetër.
Këtë të hënë u hapën aplikimet për fermerët që synojnë të subvencionohen me naftë në bujqësi. Ndryshe nga një vit më parë, këtë herë skema e subvencionimit të karburantit vendos disa kritere kufizuese siç është sipërfaqja e tokës, e cila duhet të jetë mbi 1 hektarë, të jetë me dokumente pronësie apo kontrata qiraje etj.
Ndonëse aplikimi bëhet dhe në e-Albania, shumë fermerë thonë se nuk mund ta kryejnë këtë proces online, ndaj paraqiten fizikisht pranë agro-pikave. Aplikim do të vijojë deri ne datë 11 prill, ndërsa në total fondi për skemën kombëtare të bujqësisë është 3.3 miliardë lekë, e kësaj herë nuk do jenë përfitues vetëm fermerët, por edhe blegtorët, bletarët dhe peshkatarët.
Discussion about this post