Një moment historik që shkon përtej sportit: për herë të parë në histori, flamuri i Kosovës është ngritur në Beograd. Dhe kjo tabu nuk u thye në një samit politik apo në një konferencë diplomatike, por në Kongresin e UEFA-s, organizmin më të lartë të futbollit europian.
Kjo nuk është një rastësi. Është një dëshmi tjetër se futbolli është shumë hapa para politikës, një forcë e jashtëzakonshme që mund të përcjellë mesazhe që asnjë tjetër fushë nuk arrin dot. Në një rajon ku tensionet historike shpesh mbizotërojnë, ky gjest ka një simbolikë të fuqishme: sporti mund të hapë rrugën për atë që politika shpesh e ka të pamundur – bashkëjetesën dhe pranimin.
Ky moment vjen në një kohë kur UEFA dhe Presidenti i FSHF-së, Armand Duka, janë sulmuar për vendimin e guximshëm për të organizuar Kampionatin Europian U-21 të vitit 2027 në Shqipëri dhe Serbi.
Kritikët nxituan të akuzojnë dhe të hedhin dyshime mbi këtë projekt, por ky flamur që valëvitet sot në Beograd është një përgjigje e qartë: vendimi nuk u mor për interesa të ngushta, por për të çuar përpara një mesazh të fortë bashkëpunimi dhe paqeje.
Për herë të parë, flamuri i Kosovës qëndroi përkrah atyre të federatave të tjera europiane në një event madhor në Beograd. Ky është një sinjal i qartë se barrierat mund të bien dhe se njohja nuk vjen gjithmonë nga tryezat e diplomatëve, por shpesh nga një top futbolli dhe fuqia e tij për të bashkuar njerëzit.
Discussion about this post