Efektivet e Rrugores në Tiranë kanë arrestuar një person i cili hiqej si efektiv policie duke postuar video në rrjetet sociale. Ditën e djeshme Rrugorja e kryeqytetit ka ndjekur live në “TikTok” të riun i cili ishte duke qarkulluar në rrugët e Tiranës me një furgon të bardhë dhe fenelinën e policisë ndezur.
Në momentin që ky shtetas kuptoi që ishte duke u ndjekur nga blutë menjëherë mbylli “liven” në TikTok, mirëpo ishte tepër vonë pasi efektivët kishin ndjekur çdo hap të tij.
“Hape pak krahun, hape ti legjenda e shtetit”, dëgjohet të thotë efektivi i policisë gjatë momentit kur këtij të riu iu dha sinjali për të ndaluar. Mësohet se këtij shtetasi i është pezulluar leja e drejtimit për 12 muaj.
Ky person në rrjetin social “TikTok” ka një llogari me emrin “Legjenda e Shtetit”. Herë pas here postonte video të ndryshme ku shihej teksa qarkullonte në rrugët e kryeqytetit me automjet mbi të cilin vendoste edhe fenelinën e Policisë.
Discussion about this post