Një skandal mund të quhet ai që ka ndodhur në mencën e trupave speciale të policisë, ku në ushqimet që serviren gjenden insekte.
Policia nuk ka lejuar qasje në Kuzhinën e Njësisë Speciale, por pas një inspektimi që aty ka bërë Agjencia e Ushqimit dhe Veterinarisë, është evidentuar edhe mish i dyshimtë për përdorim.
Ushqimi që serviret në kuzhinën e kampit të Njësisë Speciale të Policisë në Vrellë të Lipjanit, është i ekspozuar ndaj insekteve.
Koha ka siguruar fotografi e video, në të cilat shihet miza në supën që do e konsumonte njëri prej policëve në javën e dytë të tetorit.
Policia nuk ka dhënë përgjigje për kërkesën për të parë nga afër kushtet në të cilat ushqehen zyrtarët policorë në këtë kamp.
Në një përgjigje me shkrim që Policia ka dhënë rreth dy javë më parë, thuhet se nuk ka pranuar raportime të tilla deri tani.
Agjencia e Ushqimit dhe Veterinarisë ka kryer inspektime në kuzhinën e kampit të Njësisë Speciale dhe ka urdhëruar që të vendosen rrjeta në dritaret e hapësirave ku shërbehet ushqimi për policët.
“Në bazë të vlerësimit të ekipit inspektues ka rezultuar që kushtet e përgjithshme teknike, sanitare dhe higjienike janë të nivelit të pranueshëm ligjor. Janë dhënë vërejtje për vendosje të rrjetave në disa dritare që hapen në hapësirat e kuzhinës dhe ato shërbyese”, tha zëdhënësi i AUV-it, Lamir Thaçi për Kohën.
Në këtë agjenci vlerësuan se ekzistojnë kushtet që në kuzhinën e Njësisë Speciale të ushtrohet veprimtari e gastronomisë, por treguan se kanë hasur në një sasi mishi që është vlerësuar si e dyshimtë për përdorim.
“Gjatë inspektimit është hasur një sasi e mishit të bluar, e cila sipas vlerësimit organoleptik, ka ndryshuar vetitë tipike të këtij produkti dhe si i tillë, duhet të asgjësohet. Kanë qenë 2.2 kg që janë asgjësuar në prezencë të inspektorëve”, tha Thaçi.
Discussion about this post