Vrasja e një 45-vjeçari maroken Abderrahim El Kharmoudi në një lokal në Milano ka ndodhur përgjatë harkut kohor 22:45 – 23:58. Gjithçka nisi pas sherrit me një vajzë mbrëmjen e së dielës. Rindërtimi i ngjarjes është bërë nga pamjet e marra nga kamerat e sigurisë. Si autor i ngjarjes akuzohet një shqiptar 21-vjeçar, me precedentë penalë dhe i identifikuar nga mediat italiane si Aldo.
Në orën 23:30, karabinierët morën një telefonatë për tre të shtëna me armë zjarri jashtë një lokali në sheshin Liberta. Kur mbërritën në vendngjarje, autoritetet e gjetën lokalin të mbyllur.
Në vendngjarje nuk u gjetën persona të plagosur. Megjithatë, 500 metra më tutje ndodhej një Volksvagen Polo e bardhë, brenda së cilës ishte 45-vjeçari maroken në gjendje të rëndë shëndetësore. Në dorë ai mbante një thikë dhe pak çaste më vonë ndërroi jetë.
Kontakti parë mes Abderrahim El Kharmoudi dhe Aldos, vrasësit të dyshuar, që ishte në shoqërinë e një shoku dhe të fejuarës së tij ndodhi në orën 22:45 minuta, kur ishte dhe përplasja e parë.
Pas disa fjalëve dhe kërcënimeve, 45-vjeçari largohet me makinë për t’u rikthyer sërish. Ai rikthehet në lokal dhe shkon të kërkojë të fejuarën e Aldos. Ky i fundit në ato momente, pasi ishte larguar me skuter dhe po rikthehej në lokal. El Kharmoudi afrohet disa herë në mënyrë kërcënuese drejt vajzës, së cilës i dalin në mbrojtje 3 të rinj të tjerë në lokal. Ai i ngre dorën dhe duket sikur do ta godasë, por në fakt godet me shkelm koshin e mbeturinave, përpara se të kthehet për t’u larguar nga dera e lokalit. Por ai goditet dy herë më armë zjarri nga një armë që ende nuk është gjetur.
Një person që dyshohet të jetë 21-vjeçari shqiptar thërret: “Hajde këtu bir k*rve, ku shkon”. Disa prej dëshmitarëve thonë po ashtu se e dëgjuan të thoshte: “Kështu mëson të respektosh femrat”.
Në këtë pikë, 45-vjeçari hipën në makinë, bën pak metra e më pas bie pa ndjenja në sedilje. Të tjerët u larguan. Sipas karabinierëve, të njëjtën natë u arratisën drejt Brukselit, duke kaluar nga Zvicra. Megjithatë, ata u vunë në pranga pasditen e së mërkurës.
Discussion about this post