Vjedhja e automjeteve luksoze që përdoren në ngjarje kriminale është kthyer në shqetësimin kryesor të policisë, e cila për fat të keq nuk ka arritur të parandalojë asnjë nga ngjarjet.
Marka e preferuar është “Range Rover”, ndërsa grupet kriminale kanë shtuar punën e tyre përgjatë muajve të verës.
A2 CNN ka zbuluar dhe mënyrën se si këto automjete vidhen. Së pari, është një automjet tip “Passat”, cili udhëheq dhe njofton lidhur me aksin nëse ka patrulla policie apo jo, ndërsa pas tij është automjeti i vjedhur tip “Range Rover”.
Ndoshta makina nuk është lehtësisht e dallueshme për syrin e lirë, por detajet tregojnë shumë, siç është xhami i pasmë i thyer. Ngjarja ka ndodhur vetëm disa ditë më parë në dalje të Tiranës. Rasti tjetër ka ndodhur në mars ku pre është e njëjta markë.
E njëjta mënyrë ku një automjet i grabitësve shërben për të kontrolluar rrugën, ndërsa dy hajdutët bëjnë të mundur ndezjen e automjetit “Range Rover” dhe largohen pa lënë gjurmë.
Hetuesit dyshojnë se të gjitha makinat luksoze të grabitura do të përdoren në ngjarje kriminale, ashtu siç ka ndodhur dhe në raste të tjera, ndërsa grabitësit përdorin programe kompjuterike që bëjnë të mundur ndezjen e automjeteve.
Discussion about this post