VIDEO/Këlliçi takim me qytetarët: I është prishur terezia Veliajt

Kandidati i opozitës për Bashkinë e Tiranës, Belind Këlliçi u ndal në zonën e Kombinatit, në kuadër të turit të takimeve me qytetarët.

Këlliçi shtrëngoi duart me banorë dhe përfaqësues të biznesit në zonë, të cilët treguan me dëshpërim se si Bashkia e Tiranës i ka braktisur.

Banorëve të Kombinatit, Belind Këlliçi u përsëriti premtimin për transport publik falas pasi të zgjidhet kryetar i bashkisë në 14 maj, ndërsa shpjegoi edhe se ku do të gjenden paratë për mbajtjen e këtij premtimi.

“Ishte mërzitur Erion Veliaj se kam dhënë premtim se do e bëjë transportin publik pa lekë. Ka 24 orë, ka turr njerëzit, më sulmojnë mua, ku do i gjejë Belind Këlliçi lekët. 430 milionë euro për inceneratorë fantazëm paska lekë. 20 milionë euro, që bën total kjo që kam premtuar unë, nuk paska lekë! Për pensionistët, për fëmijët, për të varfër, nuk paska lekë. 430 ka me vjedh, 20 milionë për t`ua dhënë njerëzve nuk ka. Se pyesin, jo po ku do t`i gjejë lekët. Janë lekët”-tha ndër të tjera Këlliçi.

Gjatë takimeve në Kombinat, Belind Këlliçi takoi shumë subjekte tregtare, të cilët treguan situatën e vështirë që po kalojnë për shkak të mungesës së fuqisë blerëse, por edhe të shtimit të taksave dhe tarifave vendore nga bashkia.

“Është varfëruar vendi, s`ka rini më, nga 50 vjeç e lartë është. Kam dalë që në orën 7:00 të mëngjesit dhe kam bërë vetëm 1200 lekë të reja xhiro”- u shpreh një shitës rrobash.

“Është kot. Populli ka shkuar në zero. Nuk hap dot një biznes, më parë të vijnë taksat dhe tatimet e shtetit se sa fillon të punosh”-u shprehën administratorët e një bari në Kombinat.

Belind Këlliçi premtoi se pas 14 majit do të ketë reduktim drastik të taksave për biznesin.

“Reduktim drastik të taksave se nuk i dilet kështu. Taksat edhe pse janë rritur më shumë, ky i ka ngritur 6-10 herë, arkëton më pak sesa kur ishin më pak taksat, se shkojnë te xhepi i zyrtarëve, te arka personale e këtyre, jo te arka e bashkisë”,-u shpreh Këlliçi.

Belind Këlliçi takoi edhe xhaxhain e të ndjerit Ardit Gjoklaj, të miturit që disa vite më parë humbi jetën tragjikisht në landfillin e mbetjeve urbane në Sharrë, ndërsa bashkia e Tiranës nuk mbajti kurrë përgjegjësi. Sikur të mos mjaftojë kjo dhimbje, xhaxhai por dhe prindërit e Ardit Gjoklajt po përballen edhe me problemin e banesave që preken nga projekti i rindërtimit në Kombinat.