Një zjarr ka përfshirë mbrëmjen e së premtes një autoveturë në lagjen Tophanë të qytetit të Shkodrës. Ngjarja u raportua rreth orës 19:25 të datës 14 nëntor 2025, ndërsa flakët u neutralizuan plotësisht në 19:40, falë ndërhyrjes së shpejtë të shërbimeve zjarrfikëse.
Automjeti i djegur është një Benz A-Class, ngjyrë blu e errët, me targa AB 899 ES, në pronësi të qytetarit Llazar Llazari. Fatmirësisht, nga ngjarja nuk ka humbje jete dhe nuk raportohet për persona të lënduar.
Në vendngjarje kanë mbërritur forcat e policisë, si dhe pesë efektivë zjarrfikës të cilët ndërhynë me një mjet të specializuar zjarrfikës.
Sipas vlerësimeve paraprake, shkak i zjarrit mendohet të jetë një masë elektrike në automjet, ndërsa po vijojnë hetimet për të përcaktuar rrethanat e sakta të ngjarjes.
Autoritetet theksojnë se ndërhyrja e shpejtë ka shmangur përhapjen e flakëve dhe dëmtimin e objekteve përreth.
Discussion about this post