VIDEO/ Makina përfundon brenda në kafene, 7 persona të lënduar

Disa imazhe të kamerave të vëzhgimit thuhet se tregojnë pamjet kur një makinë përplaset në një kafene në Torino të Italisë.

Sipas mediave të huaja, ngjarja ndodhi rreth orës 9:30 të mëngjesit me orën lokale, teksa klientët po shijonin mëngjesin e tyre brenda kafenesë lokale.

Bëhet e ditur se shtatë persona janë dërguar në spital me lëndime të lehta, por nuk ka raportime për viktima.

Sipas mediave, matësi i shpejtësisë në makinë në momentin e përplasjes u bllokua në 115 km/h.

“Mund të ishte një tragjedi e vërtetë, të paktën 10 njerëz mund të kishin vdekur”, ka thënë për BBC, Simona Carastro, vajza e pronares së kafenesë.

“Tani ne thjesht shpresojmë se do të jemi në gjendje të rihapim kafenenë sa më shpejt të jetë e mundur, duke marrë parasysh dëmin e madh financiar”.

Policia po heton ende rrethanat e aksidentit.