Mbështetës të ish-kryeministrit Sali Berisha janë mbledhur edhe pasditën e sotme poshtë pallatit të tij në rrugën “Mustafa Matohiti”.
Ata kundërshtojnë masën e sigurisë të dhënë nga GJKKO për Berishën, ndërsa më herët janë shprehur se këto mbledhje janë në solidarizim me kreun demokrat.
Të pranishmëve iu drejtua me një mesazh ish-deputeti Genc Pollo, i cili u shpreh se të vërtetat duhet thënë ashtu siç janë.
“Nuk e kishim menduar se pas 33 vitesh drejtuesi i opozitës do ishte në arrest shtëpie. Ky përvjetor i Rilindjes së PD-së është më domethënës se më parë. Ata që thonë ‘në fund të fundit foli drejtësia’, janë njerëz që të njëjtën gjë mund ta thonin për gjyqin që i’u bë deputetëve të tjerë dekada më parë.
Është kohë për të thënë se aktakuzat janë turp. Nuk po them se rruga jonë drejt këtij qëllimi do jetë e lehtë apo e shkurtër, por nuk shoh rrugë tjetër. Tjetër mënyrë nuk ka”, u shpreh Pollo.
Berisha, i cili ndodhet në masën e arrestit në shtëpi prej disa ditësh ka mundur të komunikojë me mbështetësit e tij përmes fjalimeve që ka mbajtur nga dritarja e banesës.
Ish-Kryeministri i ka përshëndetur mbështetësit nga dritarja e banesës me flamujt e PD-së.
Discussion about this post