Për ikjen e energjisë elektrike në Kuvend gjatë kohës kur në Komisionin e Ekonomisë, po raportonte edhe kreu i OSHEE-së, Ardian Çela dhe ministrja e Infrastrukturës dhe Energjisë, Belinda Balluku, ka reaguar OSHEE për të sqaruar situatën e pazakontë.
OSHEE duke publikuar një video, tregon se ka qenë një shkëndijë elektrike në kabinën private në pronësi të Kullave Binjake, që ka shkaktuar ndërprerjen e energjisë në Kryesinë e Kuvendit dhe zonën përreth.
“Një shkëndijë elektrike ka shkaktuar ndërprerjen e energjisë në Kryesinë e Kuvendit dhe zonën përreth. Sipas OSHEE, për shkak të shkëndijës elektrike (duke shkaktuar zjarr), në kabinën private në pronësi të Kullave Binjake, OSHEE stakoi linjën që furnizon zonën përreth për masë sigurie. Ndërkohë, u manovrua duke rikthyer energjinë për zonën përmes linjës së dytë” – thuhet në reagimin e OSHEE.
Kujtojmë se një situatë e pazakontë ndodhi ditën e sotme, pasi energjia elektrike është ndërprerë për disa minuta sot në Kryesinë e Kuvendit të Shqipërisë ku zhvillohen mbledhjet e komisioneve parlamentare.
Megjithatë mbledhjet kanë vijuar dhe pa drita, teksa për ironi të fatit në komisionin e Ekonomisë raportonte kreu i OSHEE Ardian Çela, ndërsa në Komisionin e Ligjeve zëvendës ministri i Infrastrukturës dhe Energjisë Ilir Bejtja.
